Hotontosaina, anio, ao amin’ny Kianjan’ny Atlanta, Etazonia, ny lalao manasa-dalan’ny fiadiana ny amboara maneran-tany. Hihaona, ami’izany, ny Three Lions Angleterre sy ny Albiceleste Argentine.

Hifanandrina mandritra ny manasa-dalan’ny fiadiana ny amboara maneran-tany, “Mondial 20­26”, i Argentine, tompondaka farany sy i Angleterre. Hatao ao amin’ny Kianjan’i Atlanta, Etazonia, ny fihaonan’ny roa tonta. Mbola manarina ny fahavoazany tany amin’ny 40 taona lasa, (Mondial 1986), ny anglisy.
Tsiahivina fa nahintsan’ny Albiceleste arzantinina, tamin’ny isa 2 no ho 1, ny Three Lions anglisy, nandritra ny ampahefa-dalan’ny “Mondial 1986” io. Nalaza sy nanamarika ny tantaran’ny baolina kitra hatramin’izao ity fihaonana ity. Antony, noho ilay baolina roa tafiditr’i Diego Armando Maradona, kintan’ny baolina kitra arzantinina, tamin’izany. Azon’ny Albiceleste Argentine ny amboara tamin’izany fotoana.
“Tanan’Andriamanitra”
“ La Mano de Dios !” na “Tanan’Andriamanitra !”, « But du Siècle! ». Tsy afaka ao an-tsain’ny maro mihitsy io teny io, raha vao i Argentine sy Angleterre no resahina. Raha hiverenana kely ny tantara, nampidirin’i Maradona tamin’ny tanany ilay baolina voalohany, ary tsy hitan’ny mpitsara izany, ka nitarika 1 no ho 0, i Argentine. “Natsofok’i Mara­dona tamin’ny lohany ilay baolina, saingy nampian’ny ta­nan’Andriamanitra”, hoy i Maradona, rehefa nanontanian’ny mpanao gazety izy, ka izay no nahatonga an’ilay teny hoe: “ La Main de Dieu!”
Ny baolina faharoa kosa, ezaka vitany samy irery, rehefa nofitahiny nanomboka teny amin’ny afovoan’ny kianja hatrany anaty harato ireo mpilalao maro sy ny mpiandry tsatobin’ny Three Lions, ka nahatonga an’ilay hoe:“ But du Siècle!”.
Marihina fa efa inenina nifanandrina ny roa tonta. Tany amin’ny taona 2005 izy ireo no nihaona farany. Resin’ny Three Lions anglisy, 3 no ho 2, ny Albiceleste, tamin’­io.

Fitia Randria

Vehivavy miisa 30 niharan’ny herisetra nandrato fiofanana momba ny zaitra tetsy amin’ny CFP Tsimbazaza. Notolorana fampitaovana izy ireo hampahaleo tena hiatrehany ny fiainany. Tafiditra ao anatin’ny politikan’ny minisiteran’ny Mponina sy ny firaisankina ny fanohanana sy fampizakan-tena ireo vehivavy.

Miditra amin’ny volana fahefatra, taorian’ny nandoavana ny vatsim-pianarana volana marsa, avrily ary mey, ny fizarana vatsim-pianarana ho an’ny mpianatry ny oniversite. Efa nanomboka tamin’ny volana jona lasa teo ny fandoavana ny an’ity volana fahefatra ity ary mitohy hatramin’izao. Ny vatsim-pianarana izay azo ajanona ao anatin’ny kaonty Wallet Trésor ary alaina amin’ny fotoana izay mampety ny tsirairay.

Nivoaka ny 14 jolay 1961 ny didim-panjakana nananganana ny “Université de Madagascar” teto Antananarivo. Feno 65 taona omaly, araka izany, ity oniversitem-panjakana ity. Hatramin’izay, taranaka maro no efa nandalo tao, nandranto fahalalana, nofinofy ary fanantenana ho an’ny firenena.

Vita ny alatsinainy teo ny fitsarana ny taratasim-panadinana BEPC rehetra ho an’ny Cisco Atsimondrano. Efa mandamina ny taratasy ny mpiasa, omaly. Manomboka anio ny fampidirana ny naoty ao anatin’ny ordinatera. Tombanana hifarana rahampitso izany. Raha mizotra tsara ny dingana rehetra, hivoaka ny zoma na sabotsy ho avy izao ny valim-panadinana ho an’ny Cisco. Mbola miandry fanamafisana avy amin’ny minisiteran’ny Fana­beazam-pirenena mantsy izany, araka ny fanazavana azo tamin’ny tomponandraikitra. Mahatratra 13 600 ny mpiadina ho an’ny teny amin’ny Cisco Atsi­mondrano.
Anio kosa no hanao ny délibération ny tomponandraikitra ao amin’ny Cisco Avaradrano. Tombanana tsy ho ela aorian’izay ny voka-panadinana. 9 939 ny isan’ny mpiadina ho an’ity Cisco ity.
Efa eo am-panaovana ny fampidirana ny naoty ao anaty ordinatera koa ny Cisco Antanananrivo Renivohitra. Vinavinaina hivoaka ny faran’ny herinandro izao ny vokatra. 39% amin’ny Cisco manerana ny Nosy no efa namoaka ny valim-panadinana BEPC.
Efa nivaly miandalana izany ho an’ny Cisco maromaro, nanomboka ny faran’ny herinandro teo. Ho an’ny Cisco Maevatanàna, nahatratra 78,07% ny taham-pahafahana. Ankoatra izay, toy izao ny taha ho an’ireto Cisco manaraka ireto: 66,82 % ho an’Ambilobe ary 61,25 % ho an’Ifanadiana. Nosy-Be, nahazo taham-pahafahana 76,42% ary 76,84 % ho an’i Vohipeno. 28,85 % ny vokatra ho an’ny Cisco Anosibe An’ala, raha 35,61 % ho an’Ivohibe ary 90,95% ho an’ny Cisco Morafenobe.

Vonjy

Ho fanamafisana ny ady amin’ny fiparitahan’ny valanaretina Mpox, nidina ifotony tao amin’ny fonjaben’i Tsiroano­mandidy ireo mpiasan’ny fahasalamana, “ekipan’ny Emad”. Paikady napetraky ny fitondram-panjakana, amin’ny alalan’ny minisiteran’ny Fahasalamam-bahoaka sy ireo mpiara-miombon’antoka. Nandritra izany, nisy ny fanaovana vaksiny ny rehetra ka anisany ny mpiasan’ny fonja, ny mpiasan’ny fitsarana ary ireo voafonja.
Santionany amin’ireo paikady entina misoroka sy manapaka ny rojom-pifandraisana amin’ity valanaretina Mpox ity ny hetsika atao. Manatanteraka izany avokoa ireo tomponandraikitra rehetra eo amin’ny sehatry ny fahasalamam-bahoaka, any amin’ny faritra rehetra, manerana ny Nosy.
Manentana ny rehetra tsy hisalasala hanatona tobim-pahasalamana ny minisiteran’ny Fahasalamam-bahoaka. Fiarovan-tena sy fiarovana ny hafa ny fanaovana vaksiny miaro amin’ity valanaretina ity, hisorohana sy hiadiana amin’ny fiparitahany.

Vonjy