Nanantanteraka fotoam-pivavahana iraisam-pinoana tetsy amin’ny FJKM Ambato­mena, afakomaly, ny Hetsika fampiraisana kristianina ho an’ny firenena (HFKF) sy ny Vovonana famerenan-kasina ny fokonolona (VFKF) izay ivondronana fikambanana maro, miorina hamerina ny hasin’ny fokonolona, ahitana ny TMTM, FFMA, Fizoma, Tafo Mihaavo, Fanonga fokonolona, ny FMGKrima… Na­namarika ny faha-68 taona nijoroan’ny Repoblika Mala­gasy ihany koa izy ireo. Ma­nao antso avo ho an’ny rehetra hanome andraikitra bebe kokoa ny rafitra fokonolona izy ireo nandritra ny tafa nataony tamin’ny mpanao gazety, tetsy Antaninarenina, taorian’izay. Nambaran’ny hafatra fa tokony hatsahatra ny rafitra mampitsitokotoko napetraky ny mpanjanaka. Manentana ireo tomponandraikitra hametraka rafitra ara-dalàna mamaritra ny andraikitry ny fokonolona koa ny Vovonana, ahafahany mandray anjara amin’ny fitantanana ny raharaham-pirenena. «Tokony hifantoka amin’ny olona izany fa tsy ny rafitra», hoy ny fanambarana. «Ny fanavaozana miaraka amin’Andriamanitra Tsitoha sy amin’ny alalan’ny fokonolona no hanavaozana an’i Mada­gasikara», hoy Andrianaso­loarimina Tiana, mpandrindra nasionalin’ny HFKF, nampita ny hafatra. Miantso ny rehetra izy ireo hiala amin’ny ratsy fanao toy ny kolikoly, ny fankahalana ary ny fitiavantena. Etsy ankilany, nanolotra hevitra koa ny mba hisian’ny fifampidinihana eo amin’ny rehetra momba ny fanavaozana.
«Fokonolona mijoro, Fire­nena Miaina», io no teny filamatry ny Vovonana.

Claude Eric

Mitohy ny fampahafantarana ny vovonana Tantana. Nisy ny hetsika notarihin’ny Filoha mpanorina, Rakotoniaina Justin, tany Antsohihy. Nidinika tamin’ny PDS Ralambomanana Feno ny avy eto Antananarivo, notarihin’ny Ambasadaoro, Randrianarisoa Riana Raymonde.

Miditra amin’ny asa avy hatrany ny mpitarika ny vovonana Tantana eto amin’ny faritanin’Antana­narivo, tarihin’ny Ambasa­daoro Randrianarisoa Riana Raymonde. Hisantarana izany ny Akademian’ny mpitarika na “Academie des Leaders”. Hanomboka ny eto amin’ny faritra Analamanga. Tafiditra amin’ny fanomanana sy fikarakarana izany dia nanatanteraka fitsidihana ara-pomba fifanajana ny filohan’ny De­legasionina manokan’ny kaominina Antananarivo Renivo­hitra, Ralambomahay Feno, ny Ambasadaoro sy ny mpandrindram-paritra, Raharivolo­niaina Ninah.
Nohararaotina ihany koa ny fotoana nampahafantarana ny Vovonana Tantana, tarihin’ ny filoha nasionaly, Rakoto­niaina Justin, tamin’ity rai­amandrenin’ny tanàna ity. Nampahafantarina azy ny mombamomba ny vovonana, ny vina, ny tanjona. Noha­mafisina taminy ihany koa fa zava-dehibe ny fanohanana ny fitondram-panjakana mijoro, tarihin’ny Kly Randrianirina Michaël. Anisan’ny fototra ijoroana rahateo ny ady amin’ny kolikoly.
Tafiditra amin’ny fanapariahana ny vovonana manerana ny Nosy, nisy ny fampahafantarana natao tany Antso­hihy, notarihin’ny filoha mpanorina, tamin’ny alarobia lasa teo.
Manao antso avo amin’izay resy lahatra ho an’ny fanavaozana tena izy ny Tantana mba hifanome tanana.

r.r

Manome tolotra ara-pahasalamana mifanaraka amin’ny filàna manokana ireo mponina any amin’ny toerana lavitra ny Fitaleavana jeneraly misahana ny Tolotra ara-pahasalamana, any Vangaindrano, faritra Atsimo Atsinanana. Hifarana anio ireo tolotra ara-pitsaboana maimaimpoana, ahitana fizaham-pahasalamana amin’ny ankapobeny, ny fandidiana maro samihafa, ny fitiliana isan-karazany ary fitarafana.

Manodidina ny 150 isa ireo tanora sy olon-dehibe navitrika tamin’ilay tetikasa Nova, fiaraha-miasan’ny IMM sy ny Arovy University. Vita omaly ny fiofanana tsotra nandritra ny 10 andro nomena azy ireo. Tontosa ihany koa ny adina nifantenana ireo 25 mendrika ny vatsim-pianarana hisitrahana fianarana mandritra ny 2 taona mahery.
Hanomboka amin’io volana novambra io ny fianarana ka hifehy ireo fitaovana sy teknolojia avo lenta sy saropady any amin’ny hopitaly fanaovana fitiliana sy fitarafana izy ireo aorian’izany, araka ny fanazavana nomen’ny rektoran’ny Avory University, Ralijohn Emma.
Hiasa avy hatrany ao amin’ny IMM izy 25 mianadahy aorian’ny fihofanana ataony. Maimaimpoana, araka izany, ny fampianarana omena ireto mpianatra ireto, iantohan’ny IMM manontolo ka hikirakira mivantana ny fitaovana ary ho matihanina amin’ny fampiasana izany. Arifomba ny fotodrafitrasa mandray ireo mpianatra ary mpampianatra efa tena za-draharaha no hampita fahalalana.
Tsy ampy ny manam-pahaizana afaka mifehy ireo fitaovam-pitarafana sy fitiliana na miantsehatra amin’ny laboratoara eto Madagasikara. Tena iankinan’ny fahamarinan’ny voka-pitiliana anefa ny fahaizan’izy ireny ka izany indrindra no hisarihana ireo tanora ho liana amin’ny fiofanana.

Tatiana A

Ankehitriny, tena tsy tsaroana intsony ny fankalazana ny Andro iraisam-pirenena ho an’ny “tehina fotsy”, hoy ny filohan’ny fikambanan’ny olona manana fahasembanana amin’ny fahitana, Radafiniantsoa Josoa, omaly. Misy antony vitsivitsy mahatonga izany. Betsaka loatra ny toe-javatra ankalazaina. Ny 15 oktobra, ohatra, Andro iraisam-pirenena ho an’ny vehivavy tantsaha, Andro maneran-tany momba ny sakafo… ka tsy tsaroana intsony fa fitaovana iray sarobidy ho an’ny olona manana fahasembanana amin’ny fahitana ny “tehina fotsy”. Tena manao vivery ny ainy mihitsy anefa izy ireo, saingy tsy afa-manoatra fa mba te-hivezivezy, hiasa, hianatra toy ny rehetra. Mitombo indray ny ambana (risque) satria misy ilay lalana fiampitan’ny mpandeha an-tongotra eny Ankorondrano izay nasiana fefy tsy handehanan’ny kodiaran-droa nefa raha misy olona tsy mahita mitondra tehina fotsy eo dia tena zava-doza mihitsy. Toy izany koa ny fampiasana “feux tricolores” eto Antananarivo amin’izao, tsy mety ho azy ireo mihitsy. Satria, tokony hisy feo, “sonore”, azony henoina isaky ny karazana “feux” mitranga, raha tsy izany dia mety hifandiso ny fahazoany azy. Mety ho amin’ny fotoana handehanan’ny fiara indray no mandeha ilay olona tsy mahita.

Vonjy

Naneho ny fiarahabana sy ny firariantsoa ho an’ ny filohan’ny Fanavao­zana sy ireo mpanolotsaina avo ny antoko MMM, amin’ izao tsingerintaona voalohan’ ny fitondrana Fanavaozana izao. Maneho hatrany ny fahavononany hiara-miasa amin’ ny fanatanterahana ireo fanovana entina hanorenana firenena vanona sy hampandrosoana an’i Madagasikara ny antoko, araka ny fanamba­rana. Niaiky ny MMM fa mbola maro ireo fanamby miandry ny firenena. Mitaky fahavono­nana, fandraisana andraikitra ary fiaraha-mientan’ny rehetra ny fanatanterahana izany, mba hahazoana vokatra mi­vaingana eo amin’ny fiainany andavanandro. «Vonona ha­trany hiara-dia amin’ny fitondrana ho an’ny fanamafisana ny demokrasia sy ny tany tan-dalàna, ny ady amin’ny koli­koly, ny fanatsarana ny fiai­nan’ny olom-pirenena ary hanomana hoavy tsaratsara kokoa ho an’ny tanora ny MMM», hoy izy ireo.
Tsiahivina fa nitohy tany Vakinankaratra, Antsirabe, ny fikaonandoham-paritry ny an­toko, ny herinandro teo. Ani­san’ny voaresaka tamin’ izany ny momba ny fifidianana. «Tokony hiainga eny ifotony no hanombohana izany mba tena hipetrahan’ny fitsinjaram-pahefana tena izy. Na izany aza, manaiky ny tapaky ny maro anisa izahay amin’ny maha demokraty anay», hoy ny filoha nasionalin’ny MMM, Andrianainarivelo Hajo. Nan­teriny fa ilaina ny manadio ny lalàm-pifidianana sy manitsy ny Ceni mba hipetrahan’ny fifampitokisana ka hananana fifidianana mangarahara sy azo antoka ary eken’ny rehetra. «Efa nisy ny tolo-dalàna sy ny fakan-kevitra momba ny zotram-pifidianana natao teny Iavoloha ka tokony havadika ho lalàna izany», hoy izy.

Synèse R.

Nivory teny amin’ny foibe famantarana ny toetry ny andro ireo sampana tompon’andraikitra amin’ ny fanomanana ny fiatrehana ny trangan-javatra vokatry ny El Niño. Miteraka fikorontanana mahery vaika izy io ka mila miomana manoloana ireo loza voajanahary mifandraika amin’ny toetry ny andro. Ho fiatrehana izany, nametraka drafitra hanamafisana ny fiomanana mialoha, ny asa an-tsoroka, ny famaliana maika ny loza ny BNGRC, hisorohana ny aina afoy.

Hisy laza adina roa samy hafa amin’ny fanadinam-panjakana BEPC. Ny laza adina voalohany natokana ho an’ireo mpiadina avy amin’ny sekoly mampi­hatra ny fandaharam-pianarana vaovao. Ny laza adina faharoa kosa natao ho an’ireo mpiadina avy amin’ny sekoly mbola mampihatra ny fandaharam-pianarana teo aloha. Ahitana safidy roa mitovy amin’ny teo aloha ihany koa: safidy A sy ny safidy B.

Notokanana tamin’ity herinandro ity ny EPP Philibert Tsiranana Anjiamangirana, Cisco Antsohihy. Niorina ny taona 1901 ity sekoly izay nandrantoan’ny filohan’ny Repoblika voalohany, Philibert Tsiranana, fianarana ity. Ahitana tranon-tsekoly efatra manana
efitra valo, misy tranom-bakoka sy tranomboky ary zaridaina ny fotodrafitrasa vaovao, mahazaka mpianatra miisa 400.

Mpiasan’ny fahasalamana iray ao amin’ny CSB II Maro­vato, distrikan’­Andilamena, no niharan’ny fanafihan-jiolahy mitam-piadiana ny herinandro lasa teo, tamin’ny 6 ora ha­riva. Teny an-dalana hody rehefa avy nanatanteraka ny asa ao anatin’ny hetsika fa­naovam-baksiny VAR/polio sy fanomezana vitamina A tany atsinanana Andranotsara izy no voatafika. Vokatry izany, naratra mafy izy ary efa tsaboina ao amin’ny CHRD II Andila­mena. Araka ny fiza­hana nataon’ny mpitsabo, nahitana fahavakisana ny taolan’ny saokany sy ratra maro hafa ka ilaina ny famindrana azy maika aty Antananarivo hahazoany fitsaboana manokana noho ireo ratra ireo.
Manoloana ny tranga, noraisin’ny fitondrana amin’ny alalan’ny minisiteran’ny Faha­salamam-bahoaka an-tanana ny fikarakarana sy ny fitsaboana rehetra (fanafody, Fita­ra­fana…). Hafindra eny amin’ ny CHUJRA Antananarivo izy, hanohizana ny fitsaboana manokana.
Manameloka tanteraka ny famonoana mpiasan’ny fahasalamana ny fitondram-panjakana. Nanamafy ny sampana misahana ny fanaovam-bak­siny fa ho an’ireo mbola tsy na­ha­vita vaksiny, tokony ha­na­tona ny CSB akaiky azy ny isan-tokantrano hamita ny fatra rehetra manaraka ny tetiandrom-baksiny. Tsy voatery hiandry ny hetsika fanaovam-baksiny manokana.

Vonjy

Manampy ny orinasa hivelatra amin’ny niomerika ny Softwell amin’ny famokarana rindrambaiko mifanaraka amin’ ny filana. Nandritra ny hetsika Softevent teny Alarobia no nampahafantarana koa ny softAppli. “Natokana ho an’ny filana eto Madagasikara ny rindrambaiko novolavolaina niainga avy amin’ny traikefa nandritra ny 25 taona nijoroan’ny orinasa teto amintsika nefa manaraka ny fivoaran’ny tontolo niome­rika”, hoy ny mpanorina sady mpitantana ny orinasa, Andria­ma­nantsoa Mbolatiana.
140 ireo orinasa sy fikambanana na rafitra nanaraka ny fampahafantarana ny rindrambaiko vaovao teny an-toerana. Samy naka izay tandrify azy avy ny tsirairay. Misy ny mahasahana ny fifandraisana amin’ny mpanjifa, ny fitantanana ny mpiasa, ny fitantanam-bola, ny fitantanana ny antontan-kevitra ny rindrambaiko.
Nisy koa ny famelabelaran-kevitra sy fifanakalozana ary fizarana vahaolana niomerika ka nahatratra 700 ireo nandray anjara. Raha tarafina amin’ireo orinasa sy rafitra ary ireo tanora nanaraka ny fifampizarana rehetra, efa miroso amin’ny tontolo niomerika ny sehatrasa samihafa eto Madagasikara ka manampy azy ireo amin’izany ny softwell izay orinasa malagasy.

Vonjy

Afaka misitraka fisotroan-dronono rehefa tonga ny fahanterany ary nahazo fiahiana ara-pahasalamana rehefa marary ny mpiasa tena sy ny ankohonany manomboka izao.

Nosokafana tamin’ny fomba ofisialy tao Toa­masina ny fanohizana ny fampahafantarana ny tetikasa fanitarana ny fiahiana sosialy ho an’ny mpiasa tena sy ny vady aman-janany. Miara-­miasa amin’ny fanatanterahana izany ny teknisianina eo anivon’ny minisiteran’ny Asa, ny fampananana asa ary ny asam-panjakana sy ny Cnaps ary ny Ombona ara-pahasalamana miaraka amin’ ny Pnud. Tafiditra ao anatin’ny Politika ankapoben’ny fitondrana fanavaozana amin’ny fanomezan-danja ny maha olona ny minisiteran’ny Asa.
Rehefa tonga ny taonan’ ny fahanteran’ny mpiasa tena, zon’izy ireo feno ny hisitraka ny fiahiana ara-tsosialy toy ny fisotroan-dronono. Mbola zon’izy ireo ihany koa ny misi­traka fiahiana rehefa tsy salama amin’ny fiatrehana ny asa fivelomany. Tanjon’ny fanitarana ny tetikasa ao amin’ny faritra Atsinanana ny hanomezan-danja ny fahasalaman’ny mpiasa tena sy ny ankoho­nany, ny hampiakarana ny tahan’­ny famokarana ary ny hiantohana ny hoavin’ny mpiasa rehetra.
Ahitana sehatrasa maro ivondronan’ny mpiasa tena ao amin’ny faritra Atsinanana: mpanjono, mpamboly, mpitatitra, mpanao asa tanana, mpanao raharaham-barotra… Nahaliana ny solontenan’ny fikambanana maro tonga nanatrika ny famelabelarana mahakasika izany tetikasa izany. Nanatrika ny hetsika tany Toamasina ny tale jeneralin’ny asa eo anivon’ny minisitera, Ravelomahatratra Rojo­­mampionona.

Vonjy

Tafiditra amin’ny fankalazana ny Andron’ny 14 oktobra. Tafapetraka soa aman-tsara ny Firaisankinan’ny ben’ny Tanàna ho an’ny fanavaozana (FBF) ao amin’ny faritra Sofia.

Nidina any an-toerana, nanatanteraka fitsidihana ofisialy voalohany ny avy amin’ny birao nasionaly. Nitarika izany ny filoha mpanorina, Randrianam­boariny Jean Pierre, voafidy tany Ambohimarina, distrikan’i Manandriana. Mandrafitra ny delegasionina miaraka aminy ny sekretera jeneraly lefitra, Croidys Armand antsoina hoe Ledys, voafidy tany Mandri­tsa­ra sy Rakotomanga Dilo Razaka, ben’ny Tanàna voafidy tao Mahitsy, distrika Ambo­hidratrimo, mpitam-bola.
Anisan’ny nitsena manokana ny filohan’ny Fana­vaozana, ny Kly Randrianirina Michaël, mivady ny FBF. Tonga maro rahateo ny ben’ny Tanàna avy amin’ny faritra iray manontolo, indrindra ny avy amin’ny lisitra tsy miankina. Nandray anjara fitenenana koa nandritra ny fihaonan’ny filoha tamin’ny vahoaka tao an-toerana izy ireo. Nilaza ny ben’ny Tanàna, fa tsy afa-misaraka amin’ny Fanavaozana rahateo ny olom-boafidy. Mila izany hatreny ifotony ny va­hoaka malagasy. Nohamafi­sin’ny mpandaha-teny koa fa tahaka ny fikambanana rehetra mijoro, ankehitriny, tsy mijery antokon’olona izy ireo, fa mijoro amin’ny fotokevitra sy ny hetahetan’ny vahoaka avy any amin’ny toerana nahavoafidy azy.

r.r

Noraisin’ny fitondram-panjakana an-tanàna ny fikarakarana ireo mpampivelona sy mpamily niharan’ny lozam-pifamoivoizana tany Antsohihy. Taorian’ny fandefasana azy ireo fiaramanidina avy any an-toerana, nigadona teny Ivato ireo naratra ary tsaboina ao amin’ny CHUJRA Anosy. Raisin’ny fitondram-panjakana an-tanana ny fitsaboana ny mpampivelona efatra sy ny mpamily iray izay tena mila fitsaboana manokana. Ao anatin’izany ny fizahana ara-pahasalamana sy ny fitarafana ary ny fikarakarana rehetra.

Nitsidika ireo mpanabe Jeune Leader tao amin’ny CEG Anahidrano – Cisco Antsohihy, Dren Sofia, ny minisitry ny Fanabeazam-pirenena Rajaonarison Sendra Nirina, ny fiandohan’ny herinandro teo. Tao anatin’izany, nisy ny fanatrehana ny fanabeazana maha olom-banona, izay fotoana nanaovana fifanakalozana ho an’ireo mpampianatra. CEG 1 644 avy amin’ny faritra 16 no iasan’ireo mpanabe Jeune Leader ireo, ankehitriny.

Tonga tao Anosibe an’Ala, omaly, ny delegasionin’ny minisiteran’ny Mponina sy firaisankina, nitondra sakafo sy kojakoja ilaina amin’ny fiainana andavanandro ho fanohanana avy hatrany ireo fianakaviana traboin’ny haintrano, ny alin’ny alatsinainy lasa teo. Nijery ifotony ny fahavoazana sy niara-nidinika tamin’ireo tomponandraikitra ao an-toerana ny delegasionina, hamantarana ny filana maika.

Taorian’ny zaikabem-pirenena ho an’ny fampiroboroboana ny fahitsiana ho an’ny tanora, nokarakarain’ny Ko­mity mitandro ny fahitsiana, na­molavola «Manifeste» mom­­ba ny fandraisana andraikitra amin’ny maha olom-pirenena sy ny fahafahan’ny tanora mahazo asa ireo nandray anjara. Miaraka amin’ny fanohanan’ny Fikam­banan’ireo firenena miteny sy mampiasa ny teny Kaon­fe­derasiona Soisy ny hetsika. Anisan’ireo sosokevitra naroson’ny tanora ny hanamafisana ny teny frantsay sy ny ny fanabeazana maha olom-pirenena ary ny fampitomboana ny fahafahana mahazo fiofanana sy asa. Nanolotra sosokevitra ihany koa izy ireo ny hanamafisana ny rafitra fanaraha-maso ny fifaninanana sy ny fandraisana mpiasa ary hampifanarahana ny fiofanana amin’ny filan’ny tsenan’asa. Eo amin’ny lafiny fitantanana sy ny ady amin’ny kolikoly, niresaka momba ny fa­hitsiana eo amin’ny fampianarana ambony, ny fitantanana ara-politika, ny fanaraha-maso ny kalitaon’ny toeram-pampianarana ary ny fisorohana ny tranga kolikoly ara-nofo izy ireo.
« Amin’ny alalan’ity manifeste ity no hanehoan’ny tanora ny fahavononany handray andraikitra hampihatra ny fitsipiky ny fahitsiana any am-pianarana, arakasa ary amin’ny maha olom-pirenena. Araka izany, lasa mpampita hafatra sy masoivohon’ny fahitsiana eo anivon’ny fiarahamonina misy azy avy izy ireo », hoy ny mpikarakara.

Vonjy

Nisitraka kamiao lehibe, miisa 32, hitaterana fako manerana ny tanànan’Antananarivo Renivohitra ny Orinasa monisipaly misahana ny fanadiovana (SMA). Avy amin’ny masoivoho japoney misahana ny fiaraha-miasa iraisam-pirenena na ny Jica ireo fitaovana ireo. « Manampy amin’ny fanamorana ny fanantanterahana ny asa eny an-kianja ny fitaovana azo », hoy ny lehiben’ny sampandraharaha teknika eo anivon’ny orinasa, tetsy amin’ny foiben-toeran’izy ireo, eny Nanisana. Ankoatra ny fisitrahana kamiao, notoloran’ny Jica Bulldozer sy fitaovana fampiasa amin’ny fikirakirana kodiarana ihany koa ity orinasa ity. Olana ho azy ireo, hatreto, ny tsy fanajan’ny mpanary fako ny ora tokony hanatanterahina izany. «Voatery mivezivezy amin’ny lera tsy tokony ho izy ireo kamiao ary matetika miteraka fanelingelenana ho an’ny fifamoivoizana izany », araka ny fanazavana. Manodidina ny 1 400 m3 hatramin’ny 2 900 m3 isan’andro ny fako taterin’ireo kamiao eo anivon’izy ireo eto an-dRenivohitra.

Tsiferana R.

Hitohy anio amin’ny fametrahana fehezam-boninkazo eo amin’ny tsangambaton’ny filoha, Tsiranana Philibert, ny fanamarihana ny 14 oktobra any Antsohihy, faritra Sofia. Arahin’ny kabarin’ny filoham-panjakana, ny Kly Randrianirina Michaël, izany avy eo. Hisy koa ny fitsidihana ny trano fonenan’ny Rain’ny fahaleovantena ary hofaranana amin’ny matso.
Hentitra ny antoko Repoblikanina nasionalista. Mivaona amin’ny fotokevitry ny fanorenana ifotony ny fankalazana ny 14 oktobra, araka ny nambaran’izy ireo. «Midika ho fanohizana ny rafitra fanjanahana «Néo­coloniale», mbola mitoetra hatramin’izao izany. Anisan’ny antony nandavana an-dRajoelina ny maha frantsay azy», hoy izy ireo.
Tokony ho mailo ny filoha, ny Kly Randrianirina Michaël, araka ny nambaran’i Christian Tabera. « Mi­rodana hatrany ny fitondrana notohanan’i Pety Rakotoniaina… Avoahay koa ny porofo raha nisy ben’ny Tanàna sy sefo fokontany noterena hiditra vondrona VFM», hoy izy, nitondra valin-kafatra ho an’ny depioten’Ikalamavony.
Matoky Ratsiraka Annick fa ho vita mialoha ny faran’ny taona 2027 ny fifidianana filoham-pirenena raha misy finiavana sy fitiavan-tanindrazana. « Enim-bolana fotsiny no nanomanana ny fifidianana tamin’ny 1975. Notendrena hitarika ny « directoire militaire », Ratsiraka Didier, ny jona 1975 ary vita faran’ny taona io ihany ny fifidianana », hoy izy.

Mbola nanamafy ny fangatahany ny zanaka am-pielezana milaravinahitra any ivelany (Diaspora). Nametraka fitakiana maromaro izy ireo amin’izao fanavaozana izao. Ani­san’ny efa notakian’izy ireo teo aloha ny ahafahany mifidy amin’ireo fifidianana hatao aty Madagasikara. Tsy voatery ho tonga aty vao afaka hifidy, raha ny nambaran’ny solontenan’izy ireo, “Association observatoire de la vie publique – AOVPM”, tamin’ny alalan’ny filohany, Herininahary Mose­sy. Tsy nijanona hatreo izany. « Mitaky koa izahay mba hanana solontena, solombavambahoaka avy aminay Malagasy am-pielezana », hoy izy. Tafiditra amin’ny fandraisana anjara birikin’ny Diaspora amin’ny fampandrosoana sy ny fanorenana na fanavaozana ny firenena izany. Mba hitondran’izy ireo ny hevitra rehetra amin’ny maha olom-pirenena azy ireo na any ivelan’i Madagasikara aza, araka ny nambarany hatrany. Nanteriny fa efa misy sehatra ifampiresahan’ireo samy Malagasy any ivelany amin’ny alalan’ny «Concer­tation diaspora.com» ny mom­ba ireo fangatahana marobe nataon’izy ireo amin’ny fitondrana. Marihina fa hatolotra ny FFKM ny fehin-kevitra ni­voaka tamin’ny fikaonandoha.

Synèse R.

Mandeha indray ny fety aman-danonana, ho fankalazana ny fetin’ny Repoblika. Manan-tantara misimisy koa izany amin’ity indray mitoraka ity. Sambany rahateo no natao fanamarihana miezinezina. Mifanandrify amin’ny tsingerin-taona nandraisan-dry zalahy miaramila ny fitondrana rahateo ny fotoana. Roa sosona ny fankalazana. Efa nivolonandro fety tao an-drenivohitry ny Faritra Sofia nanomboka tamin’ny alahady. Nisomebiseby sy nientanentana hatraty an-dRenivohitra.
Mifanaretsaka ny vahiny sy ny tompon-tanàna. Vahoaka an’alinkisa no efa any an-toerana. Maro no tonga tsy hifety fotsiny fa hisehoseho, ho hitan’ny filohan’ny Fanavaozana. “Fisolelafakizasionina” ny an’ny sasany. Misy nanaovana teny midina tsy maintsy mandeha ho an’ny hafa. Maro koa anefa no nentanin’ny fitiavana hijery raha sy hifety. Raha fehezina, samy manana ny antony nahatongavany any an-toerana ny mpanatrika tsirairay. Ny hita aloha, maromaro no nandany vola hidinana any Anahidrano.
Tsy izany anefa aloha izao no lohalaharana. Asa mitarika vokatra no ilaina mba hananana ilay tena fahaleovantena. Ny 14 oktobra rahateo tsy fetin’ny fahaleovantena na ilay lazaina fa tena fahafahana. Manamarika fotsiny ny dingana vita sy ny fanaovana adisisika izany. Ny fankalazana androany dia tokony hidika ho fiaingana vaovao. Hanamarika fa izao vao tena hahaleo tena i Madagasikara. Mila fifohazan-tsaina sy fifohazam-panahy faobe.
Nanome toky sy namelona fanantenana rahateo ho an’ny Malagasy ny filazan-dry Kolonely dimy lahy tamin’ny taon-dasa. Nilaza izy ireo fa hamelo-maso ny herijika hahafahana mizaka tena tanteraka. Voakasik’izany ny fambolena, ny solika sy ny angovo. Tsy ambakan’ireo ny fanomezan-danja ny fanabeazana sy ny fahasalamam-bahoaka. Hatreto, tsy hay ny hamaritana ny fomba hanaovana tombana. Tsy hay mandroso, tsy hay mihemotra.

r.r

Tsy hisy ny dinika politika, hoy ny filohan’ny Fanavaozana, ny Kly Randrianirina Michaël, omaly, tany Antsohihy. « Olana sosialy no sedrain’ny Malagasy », hoy izy.

Natomboka omaly, tao an-drenivohitry ny faritra Sofia, ny fankazalana ny faha-68 taona nijoroan’ny Repoblikan’i Madagasi­kara. “Fotoana manan-tantara amin’ ny firenena izao, ary olana sosialy no vahana fa tsy olana politika”, hoy ny filohan’ny Fa­navaozana ny Re­poblika, ny kolonely Randrianirina Michaël, nandritra ny lanonam-panokafana.
Nisantarana izany ny fotoam-pivavahana iraisam-pinoana notarihin’ny FFKM tao amin’ny Ekar Md Paul Ambalabe. “Fahafahana: Fanavaozana ho an’ny tena Fahaleovantena sy fandrosoana” no lohahevitry ny fankalazana. Nambaran’ny filoha, nadritra izany, fa mila mahaleo tena isika, mila miaina amin’ny volantsika sy ny ha­rentsika isika. Ilaina ny fahaleovantena ara-toekarena mba tsy hiankinan’i Madaga­sikara amin’ny fanampiana avy any ivelany, fa hahazoany mivelona amin’ny harena sy ny loharanon-karenany manokana.

Manaraka lalàna

“Manaraka lalàna ny tena kristianina, fa izany no lalàna”, hoy ihany izy. Ilaina ny fahatongavan-tsaina amin’ny toe-tsaina tia kolikoly, nefa ny ankamaroan’ny Malagasy mi­petraka anaty fotaka sy rano maloto. Ankoatra izany, nankahery ny FFKM amin’ny fa­nomanana sy fikarakarana ny fikaonandoham-pirenena izy. Misy te hanakorontana izany, misy mitady hanao fanambarana, raha ny nambarany. Nambarany fa vonona hanohana sy hanampy tosika amin’ ny vola amin’ny asa sahaniny. Maro ny fitokanana fotodrafitrasa natao, omaly. Nisy ny fanolorana tamin’ny fomba ofisialy ny lavadrano sy ny trano fidiovana vaovao ho an’ny mponina any an-toerana. Nifarana tamin’ny famorian’olona tao amin’ny kianja manara-penitra izany, halina.

R. Nd.