Nifarana afakomaly, tany Tunisie, ny fiofanana rugby ho an’olona fito, “Stade de la solidarité U-18”, izay nandraisan’i Madagasikara anjara. Na­haritra herinandro mahery io fiofanana io. Nahazo ny laharana faharoa tamin’ny “Soli­darity U18 Women’s Rugby Sevens” ny ekipam-pirenena Makis Ladies. Nahazoan’ny ekipa nasionaly traikefa sy fahaizana izany.
Tsiahivina fa natao hanomanana sahady ny lalao Olympika ho an’ny Tanora (JOJ 2026) hotontosaina atsy Dakar, ny 31 oktobra hatramin’ny 13 novambra 2026 ny hetsika.
Ho an’ny taranja rugby ho an’olona fito, sokajy vehivavy, hanomboka ny 2-3 novambra ho avy izao ny fifanintsanana. Tafiditra ao anatin’ny vondrona “B” ny Makis Ladies. Ani­san’ireo ekipa sangany, ao anatin’izany, i Espagne, Eta­zonia, ary i Tchéquie.
Raha tsy misy ny fiovana, hitohy avy hatrany ny fanomanan’ireo Makis zandriny, etsy Andohatapenaka.

Fitia Randria

Niditra tamin’ny andro faharoa, omaly, ny fiadiana ny ho tompondakan’i Afrika, taranja ping-pong ho an’ny sokajy «sénior», lahy sy vavy. Fihaonana tanterahina ao amin’ny Arena Olympic Hall, Tangier, Maroc. Tsara aloha ny vokatra ho an’ireo solontena malagasy, izay mandravarava tokoa. Porofon’ izany, nahazo fandresena hatrany ny lehilahy isan-tarika ho an’ny vondrona fahatelo. Nandresy an’i Rwanda, 3 no ho 0, avy eo nanilika an’i Tu­nisie, 3 no ho 1, ho an’ny an­dro voalohany. Teo amin’ny andro faharoa, nandresy tsy niady an’i Congo. Nitana ny laharana voalohany ary tafita amin’ny ampahefa-dalana. Ny vehivavy indray, nandresy an’i Senegal, 3 no ho 0, avy eo niondrika teo anatrehan’i Alge­rie, 0 no ho 3. Timiary, Antoine, Tsilavo, Fabio eo amin’ny lehilahy ary i Edena sy i Hanitra ary i Vony Ange ho an’ny vehivavy. Marihina fa hifarana amin’ity talata ity ny fifaninanana. Hanana ny lanjany lehibe ity fiadiana ny ho tompondakan’i Afrika ity satria hiadiana ny tapakila hiatrehana ny ho tompondaka maneran-tany tanterahina any Astana, Kazakhstan, amin’ny taona 2027.

Tompondaka

Nanainga omaly vao maraimbe, ny ekipam-pirenena malagasy, taranja billard. Hiatrika ny fiadiana ny ho tompondaka maneran-tany tanterahina ao Cape Town Afrika Atsimo, manomboka ny 23 oktobra ka hatramin’ny 1 novambra ho avy izao ny anton-dian’izy ireo. Miisa 27 mianadahy ireo hiaro ny voninahi-pirenena.

Hifanandrina amin’ny famaranana amin’ny «Top 8», taranja rugby, ny Cosfa sy ny Uscar. Ny alahady lasa teo, teny Andohatapenaka, lavon’ny Cosfa tamin’ny isa 91 no ho 29 ny TFA ary resin’ny Uscar tamin’ny mokafohy, 45 no ho 44, ny TFMA. Hanala vela amin’ny Cosfa izany ny Uscar, amin’ity.

Nifarana ny alahady lasa teo, tao amin’ny torapasik’i Itsandra, Comores, ny andiany faharoa tamin’ny Beach-volley, ho an’ny faritra faha-7. Nanao pao-droa i Maurice, tamin’ity. Fahefatra ny ekipam-pirenena malagasy teo amin’ny sokajy vehivavy.

Ao anatin’ireo miatrika ny fiadiana ny ho tompondaka maneran-tany amin’ny lalaon-tsaina Echecs, sokajy zandriny, i Madagasikara. Eo ho eo ny vokatra, saingy misongadina ny zava-bitan’i Jude Fortun, eo amin’ny “Open U11”. Nandresy mpilalao espaniola roa izy ary manana vokatra tsara.

Mitohy hatrany ny fifanintsanana eo amin’ny fiadiana ny ho tompondaka maneran-tany, taranja lalaon-tsaina “Echec”, ho an’ny sokajy zandriny. Fiha­onana tanterahina ao amin’ny efitrano Roquetas de Mar, Espagne. Manana solontena amin’izany ny Malagasy, izay miisa 8 mianadahy. Nahavita dingana tsara teo amin’ny «Open» sokajy U11, i Jude Fortun. Nandritra ireo fihodinana valo efa tontosa, izay natao tamin’ny “Système suisse”, nahazo fandresena telo izy, faharesena telo ary ady sahala roa. Anisan’izany ny nandavoany ilay espaniola, i Martinez Salmeron Daniel, tamin’ny isa 1 no ho 0, teo amin’ny “round 2”. Teo koa ny nanilihany ilay Libaney, i Kaafarani Majd, tamin’ny isa 1 no ho 0 ihany koa ary ilay espaniola, i Jimenez Bazhin Alexander nandritra ny “round” fahafito. Izy aloha, ha­treto, no hany manana vokatra misongadina.
Ankoatra izay, eo ho eo daholo. Raha ho an’ny U17, vehivavy, misy an’i Tafita Tsiaro. Faharesena dimy sy ady sahala iray ary fandresena iray no azony. Ho an’ny i Mika indray eo amin’ny U15, resy inefatra izy ary nanao ady sahala telo sy fandresena tokana. Teo amin’ny U11, tsy nanana fandresena i Melody Grace. Ady sahala iray sy faharesena enina. Ho an’ny “Open” U15, faharesena enina ihany koa sy fandresena iray ihany ny an’i Manjaka. “Open” U13, ady sahala iray sy fandresena iray ary faharesena dimy ny vokatra azon’An­drianina. Ny U9, faharesena enina sy fandresena roa ho an’i Nehemiah. Ary ny “Open” U7, fandresena roa sy faharesena dimy ny an’i Tsiory. Tsiahivina fa sokajy telo amin’ireo 11 hifaninanana amin’ity fiadiana ny ho tompondaka maneran-tany ity no tsy ananan’ny Malagasy mpifaninana, dia ny U13 sy ny U9 ary “Open” U17.

Tompondaka

Natolotry ny orinasan’ny Seranan-tsambon’i Toama­sina (Spat), ny faran’ny herinandro teo, ny fotodrafitrasa trano fivoahana sy fidiovana ahitana efitra 12 ka ny telo ho an’ny mpandraharahan’ny oniversité. Ho an’ny mpianatra kosa ny sivy. Fotodrafitrasa natao hahatohitra rivodoza mahery vaika, toa an’i Gezani teo, io fotodrafitra nataon’ny Spat ho an’ny oniversiten’i Barikadimy io. Tsotra ny hafatry ny tale jeneralin’ny Spat, Randriambahoaka Heritiana Anicet, fa dingana ihany ny fahavitan’ny fotodrafitrasa fa tena zava-dehibe ny fikojakojana azy ho fananana iombonana, hateza ho an’ny taranaka. «Mitotaly 123 ny fotodrafitrasa niharan’ny fahasimbana vokatry ny rivodoza Gezani», hoy kosa ny filohan’ny oniversiten’i Toamasina, profesora Razanakolona Diny. Efa mivonona amin’ny fametrahana komity hitantana ny fampiasana sy fikojakojana ny fotodrafitrasa vao vita ny mpianatra, amin’izao fotoana izao, hoy hatrany izy. Nohamafisiny hatrany fa anatin’ny fanamboarana tanteraka ny oniversité ka anisan’izany ny fanamboaran-dalana mamakivaky ao anatin’ny faritry ny oniversite sy ny manodidina, mirefy efatra km. Efa manangasanga koa ny fahavitan’ny «demi-tonneau» izay niantohan’ny Ban­ky iraisam-pirenena. Santio­nany amin’ny fotodrafitrasa noraisin’ny Spat an-tanana ity natolotra ity fa mbola betsaka ireo trano fipetrahan’ny mpianatra sy efitrano fianarana, hoy hatrany ny filohan’ny oniversiten’i Toamasina.

Sajo

Ny fifaninanana karakarain’ny klioba Auto sy Cross Car de Tana (ACCT) no manakatona ny fiadiana ny ho tompon­dakan’­i Madagasiakra 2026, taranja Slalom. Hotanterahina ny 7 sy 8 novambra ho avy izao izany, eny amin’ny Kianja Ampi­la­nonana Ambohimanga Rova. Andiany faha-23 iarahana hatrany amin’ny orinasa Star, miaraka amin’ny marika XXL. Nomena ny anarana hoe XXL Last Race by Carrefour izany. Io no nambaran’ny tomponandraikitra nandritra ny fihaonany tamin’ny mpanao gazety, teny Andraharo, ny zoma lasa teo. Noferana ho 50 ny isan’ny mpandray anjara, mitsinjara amin’ ny sokajy fiara, 4X4, Cross Car ary SSV. Hisy ny andrana ho an’ireo mpifaninanana, avy eo hitohy amin’ny tena fifanina­nana. Hampiavaka ity ny fisian’ny amboara «Bandy rangahy». Eo koa ny fandefasana mivantana amin’ny fahitalavitra lehibe ny vokatry ny fifaninanana ho an’ny sokajy Sénior. Ho fety be tokoa ny XXL Last Race satria hisy ny kilalao ho an’ny ankizy sy ny hirahira. Hamarana ny fotoana ny fanolorana ny am­boara ho an’ireo tompondaka nasionaly 2026.

Tompondaka

Ratsy ny vokatra ho an’ny CFFA, teo amin’ny lalao mandroso, anatin’ny dingana faharoa hiadiana ny ho tompondakan’i Afrika «Ligue des cham­pions Afrique », taranja baolina kitra. Nomontsanin’ny Young Africans Tanzanie, tamin’ny isa mavesatra, 4 no ho 0, mantsy izy ireo. Fihao­nana notanterahina ny sabotsy lasa teo, tao amin’ny Kianja Azam Complex Stadium ao Dar-es-Salam. Tsy nisy na­nam-po io isa io ny rehetra. Samy nihe­vitra ny mpanara-baovao fa hahatafiditra baolina ny solontena malagasy. Na izany aza, nanatombo teo amin’ny fifehezana ny kianja sy ny fitazomam-baolina ny Tanzania­nina. 63 % izany ho an’ny Young Africans ary 37 % monja ny an’ny CFFA. Nampi­ditra ny baolina voalohany ry zareo, teo amin’ny minitra faha-39, tamin’ny alalan’i Cheikh Touré, rehefa votsotra teny an-tanan’i Gôly kely mpiandry tsatoby ny baolina. Nentin’ny roa tonta niala sasatra io isa 1 no ho 0 io. Fizaram-potoana faharoa, tsy hita tao amin’ireo mpilalaon’ny CFFA loatra ilay fahavitrihana sy fanafainganana lalao. Mbola nanampy isa indray avy eo ny Young Africans, teo amin’ny minitra faha-47, izay tafiditr’i Albert Kangwanda. Tsy nijanona teo fa mbola nampian’i Mudathir Yahia in­dray, teo amin’­ny faha-54 mn nilalaovana ary nofaranan’i Maxi Nzen­geli, minitra faha-59. Lavo tanteraka ny CFFA. Lalao miverina hotanterahina rahampitso alarobia any Tan­zanie ihany. Sarotra nefa azo atao. Inoana fa hiezaka hanarina sy hanitsy ny lesoka ny mpanazatra.

Tompondaka

Ny tsy mamindra tokoa toa mihemotra. Marina izany satria ny olona tsy mandeha fa mijanona am-pitoerana dia tsy lasa lavitra fa songonan’izay mandeha. Voaporofo ao anatin’ ny fifaninanana amin’ny fanatanjahantena izany. Ity tontolo ity izay tsy hita izay ilazana azy eto Madagasikara na mandeha na tsia. Tsy taranja ho an’olon-tokana fa eo koa ny iraisana. Mamalan-kira avokoa ny ankamaroany. Ny tsy mitondra vokatra efa zary mahazatra ny maheno azy. Ny mahazo fandresena, toa ahitana pentina sy tsininy hatrany. Ny iraisana aloha, olana ara-bola. Ny vola tokoa no hozatry ny fiainana ary tsy mizotra amin’ny tokony ho izy io, rehefa tsy eo ny vola. I Kotomainty no naka ka i Kotofotsy no takina.
Mandresy ny tsipy kanetibe, takin’ny sasany ny vola azo tamin’ny fandresena fa toa tsy mifanaraka amin’ny hatsembohan’ireo tena niady teny an-kianja fa ireo mialokaloka fotsiny no mitavana ireo volabe azo. Dia mifandrirarira eny ka mifampitoroka etsy sy eroa. Resy ny Makis, takina ireo tambin-kasasaran’ny mpilalao izay nampanantenaina. Ny mpitsara baolina kitra, manangam-bovona fa tratry ny tsindrihazolena sy ramatahora lava izao raha mitaky ny karamany sy ny volany. I Kotomainty no naka ka i Kotofotsy no takina. Maro no azo ambara fa ireo aloha no tsy mahavita manasa ny lambany ao an-tokantranony fa maneho ny malotony ho hitan’ny olona ety ivelany. Tsy hita intsony izay haleha fa mikitao­taona avokoa izay diavin’ny tongotra ka atahorana handratra. Tsy mety tokoa raha i Kotomainty no naka ka i Kotofotsy no
takina. Toy ny vavabasy izy ity ka izay hidirany ihany no hivoahany.

Tompondaka

Nahazo fotodrafitrasa manaraka ny fenitra iraisam-pirenena ny baolina kitra malagasy. Fandaharanasa Fifa Forward. Afaka ampiasaina ho fanomanana ny ekipam-pirenena ny ivontoerana teknika nasionaly eny Carion. Na izany aza, tsy mbola afaka handraisana lalao iraisam-pirenena.

Tontosa ny sabotsy lasa teo, tany Nandihizana Carion, ny fitokanana tamin’ny fomba ofisialy ny ivontoeram-piofanana teknika ho an’ny baolina kitra. Fanda­haranasa Fifa Forward ary vola 2, 71 dolara izay avy amin’­ ity farany no nanavaozana sy nanamboarana izany. Nan­defa hafatra tamin’ny horonantsary ny filohan’ny Fifa, Gianni Infantino. Niara­haba sy nankasitraka ary naneho ny fiombonam-pon  amin’ny Federasiona malagasy (FMF) sy ny vahoaka malagasy ny tenany, amin’izao fahazoana fotodrafitrasa manaraka ny fenitra iraisam-pirenena izao. Satria, nahazo ny «certification » Fifa Quality Pro ny kianja, izay voalohany nisian’izany eto Madagasi­kara. Toerana natokana ho an’ny ekipam-pirenena, ahitana «gradin» mahazaka mpijery 600, efi­trano fianarana sy fatoriana. Trano fidiovana sy fitsaboana. Miampy efitrano fivoriana ary toerana fanabokonana hozatra. Amin’izao fanombohana izao, miofana sy manoman-tena ao ny Barea U15. Nan­gatahin’ny filohan’ny Federa­siona, Andriamanam­pisoa Alfred, tamin’ireo mpanolotsain’ny Fanaovazana, nisolo tena ny filohan’ny Fanavao­zana ny Repoblika, ny hanitarana ny toerana hahazaka mpijery 12 000 hahazoana fankatoavana amin’ny Fifa ka hahafahana mandray lalao iraisam-pirenena. Nanatrika sy nanome voninahitra ny fotoana, omaly, ny filohan’i Afrique sy Caraibe eo anivon’ ny Fifa, i Gelson Fer­nandes sy ny minisitry ny Fana­tan­jahantena, Rasam­bany Alain. Ankoatra ity ivontoeram-piofanana ity, notokanana omaly ihany koa ny Fifa Arena Am­pangabe. Lany nandritra ny fivoriambe ny sata mifehy ny baolina kitra, taorian’ny fanintsiana ireo teboka vitivitsy. Anisan’izany, ny fampitomboana ny isan’ny mpifidy amin’ ny fifidianana manomboka ny taom-piasana 2031.

Tompondaka

Notanterahina tao amin’ny Maison Russe eto Madagasikara, ny sabotsy lasa teo, ny Festival iraisam-pirenena andiany faha-4 momba ny kolontsaina rosianina « Khorovod de l’amitié ». Hetsika nampivondrona ireo mpankafy ny teny sy ny kolon­tsaina rosianina, izay niarahana tamin’ny fanohanan’ny Maison Russe. Mpampia­natra avy ao amin’ny Ivontoerana momba ny siansa maha olona ao amin’ny Oniversi­tem-panjakana ao Shadrinsk, any Rosia, no nikarakara ny hetsika.

Fahombiazana ny antsam-paribolana Miako, notontosaina teny amin’ny CGM Analakely, ny sabotsy lasa teo. To­non­kalo mifamaly sy miavaka maro no nifandimby nanakoako. Nanentana ny mpijery tamin’ny fahaiza-manaony ihany koa ry Le Mahenina sy Mama Tagany. Ho avy tsy ho ela ny fandaharam-potoana manaraka ho an’ny Faribolana Sandratra.

Nafana ny fampisehoana niara­hana tamin’ny tarika Rossy, teny amin’ny Parvis Analakely,omaly. Tonga marobe ireo mpankafy sy mpijery izay niara-niaina indray ny kanto tsy lefy lazan’izany tarika izany. Tsiahivina fa tafiditra anatin’ny he­tsika karakarain’ny BGFI Bank ho fampahafantarana ny « Gasy Money » ity fampisehoana ity.

Notanterahina tany Betafo, ny fa­ran’ny herinandro teo, ny hetsika ara-kolontsaina “Diavolan’Andratsay”. Fampa­hafan­tarana ny tantara sy ny hasin’ny Rova ary ny soatoavina tandrovana no natao nandritra izany, ka naseho tao anatin’ny “Rova mitety vohitra”, ny Rova ao Ambohimanga, amin’ny maha harembakoka iraisan’izao tontolo izao azy.

Hanomboka ny alatsinainy 19 oktobra izao ny “The Knoc­kouts”, fifaninanan-kira “The Voice of Europe”. Tsy diso an­jara amin’izany i Masa­gasi­kara, nahavoafantina an’i Samuella. Misy 20 ireo mpandray anjara hifaninana izay notsongaina noho ny talenta ananan’izy ireo. Hira haranty eo anivon’ny tambajotran-tserasera no hitsarana ireo mpifaninana ka amin’io alatsinainy io no manomboka ny fanaparitahana izany. Miantso fa­nohanana avy amin’ny Mala­gasy i Samuella, satria 50 isan-jato no anjaran’ny mpifidy ary ny 50 isan-jato kosa an’ny mpitsara. Tanjona ho an’i Samuella ny ho tafiditra anatin’ ny roa voalohany ao amin’ny vondrona misy azy ka hahafahany mahazo ny tapakila amin’ ny fihodinana faharoa. “Zava-dehibe amiko ity fifaninanana ity, satria manome ahy fahafahana iray hafa hisolo tena ny fireneko amim-pireharehana, sady hizara ny tontoloko, ny zavatra tiako fatratra ary ny maha izy ahy”, hoy i Samuella.

Mi.Raz

Zily avy any Mayotte, Souncheitfit, Phil Bill avy any Cameroun ary i Wizboy avy any Nigeria. Ireo no vahiny mpanakanto nasaina ka efa tonga eto Madagasikara handray anjara amin’ny andiany faharoa amin’ny « Afromada Music Awards ».

Nosokafana omaly, tetsy amin’ny Radisson Blu Hôtel ny hetsika, tamin’ ny alalan’ny fampahafanta­rana ireo mpanakanto rehetra, ireo mifaninana any anaty sokajy izany, na ireo nasaina manokana hanatrika na hi­tsara. Mialoha izay anefa, nizara ny lalantsaina itondrana ny « Afromada Music Awards » ireo mpikarakara. « Tanjona ny hamirapiratan’ireo mpanakanto eto Madagasikara, ma­nerana an’i Afrika ary mane­rana an’izao tontolo izao. Fifampi­zarana sy fifanakalozana ny zavakanto afrikanina, izay ahitana fifanakaikezana izany. Hahafahan’ireo mpamokatra mahita ireo mpanakanto manan-talenta azo amidy eo amin’ny tsenan’ny mozika ihany koa », hoy ny fanazavan’ny Dr Falafala. Mpanakanto afrikanina sady mpamokatra mpanakanto ihany koa izy, saingy nisafidy ny hikarakara ny hetsika eto Madagasikara noho ny fahatsapany fa manana ny hoaviny ny mozika malagasy.
« Mahatsapa fa iray isika aty Afrika. Manan-karena zava­kanto ary azo entina mane­rana izao tontolo izao », hoy kosa i Souncheitfit, mpanakanto avy any Cameroun, saingy monina any France. Iray amin’ireo mpitsara sady hiaka-tsehatra hanafana ny lanonana izay hamantarana ireo mpanakanto afrikanina mendrika isan-tsokajy izy. Mbola hatao etsy amin’ny Radisson Blu Hôtel ihany izany, anio.

Zo ny Aina

« Miara-mientana isika hiady amin’ny homamiadan’ny nono sy ny vozon’ny tranonjaza ». Io ny lohahevitra entina hankalazana ny “Octobre rose” amin’­ity taona ity. Eny amin’ny kaominina Bema­soandro Itaosy no hanaovana ny fanamarihana, ny
23 oktobra ho avy izao. Hisy fanentanana sy fitiliana maimaimpoana ho an’ny vehivavy, entina hanamafi­sana ny ady amin’ny homamiadan’ny nono sy ny vozon’ ny tranonjaza.

Nijery ny fanohizana ny asa fanorenana ny oniversiten’Antsohihy ny minisitry ny Fampianarana amba­ratonga ambony sy ny fikarohana ara-tsiansa, tamin’ity herinandro ity. Orinasa vaovao no mandray ny asa. Nifanaiky ny rehetra fa hanara-maso akaiky ny fanatanterahana izany. Taorian’izay, nihaino ny hetahetan’ny mpianatra ao amin’ny Institut Uuniversitaire de technologie et d’agronomie de Mahajanga (Iutam) ao Antsohihy, ny minisitra.

Mikarakara Salon de l’étudiant nanomboka omaly ary hitohy anio, ny oniversiten’i Toamasina, ran­tsana ao Vatomandry. Hanomezana torolalana ho an’ ireo olona manana mari-pahaizana bakalorea, ha­haizan’­izy ireo misafidy ny oniversite hanohizana fianarana izany. Tanjona ny hanampy hisafidy ny sampam-piofanana arahina rehefa hianatra amin’ny oniversite sy mamantatra ireo karazan’asa mifandraika amin’ny
fianarana hatao.

Ao anatin’ny Iray volan’ny tanàn-dehibe isika izao. Man­kalaza izany ny eny amin’ny distrikan’Avaradrano, amin’ny alalan’ny varavarana misokatra izay hatao eny amin’ny kaominina Alasora, ny talata 20 okotobra 2026 ho avy izao. Hisy ny fizarana fahalalana momba ny fanajariana ny tany izay hampandrosoana ny tanàna. “Hampaha­fantarina ny mponina ny maha zava-dehibe ny fanajariana ny tany sy ny famahana ny olana toy ny tsy fisian’ny lalàna eny an-toerana”, hoy ny Dr Ranaivo­sa­­mimanana Tolotra Stéphan, lehiben’ny sampandraharaha ifotony miandraikitra ny fanajariana ny tany eny Avara­drano. Tanjona ny hanenta­nana ny olona hanara-dalàna rehefa manorina trano. « Man­dray ireo olona tsy mbola manana permis de construire nefa efa nanorina trano ka te hampanara-dalàna ny fanorenana nataony ny kaominina Ala­sora, manomboka amin’io fotoana io”, hoy ny ben’ny Tanàna Alasora, Randrian­tsoa Jimmy. Hotohizana amin’ ity volana ankalazana ny tanàn-dehibe ity izany, raha ny fanazavana. Marihina fa manodidina ny 400 isan-taona ny fahazoan-dalana hanorina omen’ ny kaominina Alasora, saingy betsaka noho ireo ny mpanorina eny amin’ny toe­rana tsy ara-dalàna, raha ny fanazavana. Iarahan’izy ireo miasa amin’ny sampandraharaha ifotony misahana ny fanajariana ny tany ny hetsika. Entanina, araka izany, ny mponina eny an-toerana mba ho avy hanatrika izany varavarana misokatra izany.

Mino

Nanao fanambarana ny fikambanan’ny mpianatra Teraka Sofia mianatra ao Antsiranana (Tesomia) sy ny Sava-U mandranto fianarana ao amin’ny oniversiten’Antsiranana. Mitaky fitovian-jo eo fizarana ny trano fonenan’ny mpianatra ao amin’­io oniversite io izy ireo. Manana fikambanana 11 mivondrona ao anatin’ny fikambanana roa ireo mpianatra ary efa nihaona tamin’ny talen’ny kabinetran’ny minisiteran’ny Fampia­narana ambony sy ny fikarohana ara-tsiansa, araka ny fanazavan’ny mpitondra teny. Nilaza ity tomponandraikitra ambony ity fa mifanaraka amin’ny isan’ny mpianatra misoratra anarana ny isan’ny trano omena nefa mahatsapa ny fikambanana fa tsy mitovy amin’izay ny zava-misy.
« Samy mpianatra ao amin’ny oniversiten’Antsiranana ka mitaky ny fitovian-jo sy ny fitoviana eo amin’ny fahazoana trano fonenana ho an’ny mpianatra rehetra », araka ny fanehoan-kevitra. Tsy hanaiky ny fanapahan-kevitra ary milaza fa tsy mbola azo hidirana ny trano raha tsy voavaha ny olana mifandraika amin’ny fizarana.
Miantso ny minisitera mpiahy sy ny mpitantana ny oniversiten’Antsiranana ny fikambanana hijery ny olana misy ankehitriny. Satria, tsy tokony hisy fanavakavahana fa samy mpianatra mendrika ny hitovy zo sy hahazo rariny.

Vonjy

Nanantanteraka fotoam-pivavahana iraisam-pinoana tetsy amin’ny FJKM Ambato­mena, afakomaly, ny Hetsika fampiraisana kristianina ho an’ny firenena (HFKF) sy ny Vovonana famerenan-kasina ny fokonolona (VFKF) izay ivondronana fikambanana maro, miorina hamerina ny hasin’ny fokonolona, ahitana ny TMTM, FFMA, Fizoma, Tafo Mihaavo, Fanonga fokonolona, ny FMGKrima… Na­namarika ny faha-68 taona nijoroan’ny Repoblika Mala­gasy ihany koa izy ireo. Ma­nao antso avo ho an’ny rehetra hanome andraikitra bebe kokoa ny rafitra fokonolona izy ireo nandritra ny tafa nataony tamin’ny mpanao gazety, tetsy Antaninarenina, taorian’izay. Nambaran’ny hafatra fa tokony hatsahatra ny rafitra mampitsitokotoko napetraky ny mpanjanaka. Manentana ireo tomponandraikitra hametraka rafitra ara-dalàna mamaritra ny andraikitry ny fokonolona koa ny Vovonana, ahafahany mandray anjara amin’ny fitantanana ny raharaham-pirenena. «Tokony hifantoka amin’ny olona izany fa tsy ny rafitra», hoy ny fanambarana. «Ny fanavaozana miaraka amin’Andriamanitra Tsitoha sy amin’ny alalan’ny fokonolona no hanavaozana an’i Mada­gasikara», hoy Andrianaso­loarimina Tiana, mpandrindra nasionalin’ny HFKF, nampita ny hafatra. Miantso ny rehetra izy ireo hiala amin’ny ratsy fanao toy ny kolikoly, ny fankahalana ary ny fitiavantena. Etsy ankilany, nanolotra hevitra koa ny mba hisian’ny fifampidinihana eo amin’ny rehetra momba ny fanavaozana.
«Fokonolona mijoro, Fire­nena Miaina», io no teny filamatry ny Vovonana.

Claude Eric

Mitohy ny fampahafantarana ny vovonana Tantana. Nisy ny hetsika notarihin’ny Filoha mpanorina, Rakotoniaina Justin, tany Antsohihy. Nidinika tamin’ny PDS Ralambomanana Feno ny avy eto Antananarivo, notarihin’ny Ambasadaoro, Randrianarisoa Riana Raymonde.

Miditra amin’ny asa avy hatrany ny mpitarika ny vovonana Tantana eto amin’ny faritanin’Antana­narivo, tarihin’ny Ambasa­daoro Randrianarisoa Riana Raymonde. Hisantarana izany ny Akademian’ny mpitarika na “Academie des Leaders”. Hanomboka ny eto amin’ny faritra Analamanga. Tafiditra amin’ny fanomanana sy fikarakarana izany dia nanatanteraka fitsidihana ara-pomba fifanajana ny filohan’ny De­legasionina manokan’ny kaominina Antananarivo Renivo­hitra, Ralambomahay Feno, ny Ambasadaoro sy ny mpandrindram-paritra, Raharivolo­niaina Ninah.
Nohararaotina ihany koa ny fotoana nampahafantarana ny Vovonana Tantana, tarihin’ ny filoha nasionaly, Rakoto­niaina Justin, tamin’ity rai­amandrenin’ny tanàna ity. Nampahafantarina azy ny mombamomba ny vovonana, ny vina, ny tanjona. Noha­mafisina taminy ihany koa fa zava-dehibe ny fanohanana ny fitondram-panjakana mijoro, tarihin’ny Kly Randrianirina Michaël. Anisan’ny fototra ijoroana rahateo ny ady amin’ny kolikoly.
Tafiditra amin’ny fanapariahana ny vovonana manerana ny Nosy, nisy ny fampahafantarana natao tany Antso­hihy, notarihin’ny filoha mpanorina, tamin’ny alarobia lasa teo.
Manao antso avo amin’izay resy lahatra ho an’ny fanavaozana tena izy ny Tantana mba hifanome tanana.

r.r

Manome tolotra ara-pahasalamana mifanaraka amin’ny filàna manokana ireo mponina any amin’ny toerana lavitra ny Fitaleavana jeneraly misahana ny Tolotra ara-pahasalamana, any Vangaindrano, faritra Atsimo Atsinanana. Hifarana anio ireo tolotra ara-pitsaboana maimaimpoana, ahitana fizaham-pahasalamana amin’ny ankapobeny, ny fandidiana maro samihafa, ny fitiliana isan-karazany ary fitarafana.

Manodidina ny 150 isa ireo tanora sy olon-dehibe navitrika tamin’ilay tetikasa Nova, fiaraha-miasan’ny IMM sy ny Arovy University. Vita omaly ny fiofanana tsotra nandritra ny 10 andro nomena azy ireo. Tontosa ihany koa ny adina nifantenana ireo 25 mendrika ny vatsim-pianarana hisitrahana fianarana mandritra ny 2 taona mahery.
Hanomboka amin’io volana novambra io ny fianarana ka hifehy ireo fitaovana sy teknolojia avo lenta sy saropady any amin’ny hopitaly fanaovana fitiliana sy fitarafana izy ireo aorian’izany, araka ny fanazavana nomen’ny rektoran’ny Avory University, Ralijohn Emma.
Hiasa avy hatrany ao amin’ny IMM izy 25 mianadahy aorian’ny fihofanana ataony. Maimaimpoana, araka izany, ny fampianarana omena ireto mpianatra ireto, iantohan’ny IMM manontolo ka hikirakira mivantana ny fitaovana ary ho matihanina amin’ny fampiasana izany. Arifomba ny fotodrafitrasa mandray ireo mpianatra ary mpampianatra efa tena za-draharaha no hampita fahalalana.
Tsy ampy ny manam-pahaizana afaka mifehy ireo fitaovam-pitarafana sy fitiliana na miantsehatra amin’ny laboratoara eto Madagasikara. Tena iankinan’ny fahamarinan’ny voka-pitiliana anefa ny fahaizan’izy ireny ka izany indrindra no hisarihana ireo tanora ho liana amin’ny fiofanana.

Tatiana A

Ankehitriny, tena tsy tsaroana intsony ny fankalazana ny Andro iraisam-pirenena ho an’ny “tehina fotsy”, hoy ny filohan’ny fikambanan’ny olona manana fahasembanana amin’ny fahitana, Radafiniantsoa Josoa, omaly. Misy antony vitsivitsy mahatonga izany. Betsaka loatra ny toe-javatra ankalazaina. Ny 15 oktobra, ohatra, Andro iraisam-pirenena ho an’ny vehivavy tantsaha, Andro maneran-tany momba ny sakafo… ka tsy tsaroana intsony fa fitaovana iray sarobidy ho an’ny olona manana fahasembanana amin’ny fahitana ny “tehina fotsy”. Tena manao vivery ny ainy mihitsy anefa izy ireo, saingy tsy afa-manoatra fa mba te-hivezivezy, hiasa, hianatra toy ny rehetra. Mitombo indray ny ambana (risque) satria misy ilay lalana fiampitan’ny mpandeha an-tongotra eny Ankorondrano izay nasiana fefy tsy handehanan’ny kodiaran-droa nefa raha misy olona tsy mahita mitondra tehina fotsy eo dia tena zava-doza mihitsy. Toy izany koa ny fampiasana “feux tricolores” eto Antananarivo amin’izao, tsy mety ho azy ireo mihitsy. Satria, tokony hisy feo, “sonore”, azony henoina isaky ny karazana “feux” mitranga, raha tsy izany dia mety hifandiso ny fahazoany azy. Mety ho amin’ny fotoana handehanan’ny fiara indray no mandeha ilay olona tsy mahita.

Vonjy