Mirongatra ny trangana fa­nafihana mitam-piadiana any amin’ny faritr’i Toamasina tato ho ato. Notafihin’ny jiolahy mi­rongo fitaovam-piadiana indray ny lehilahy iray nikasa hanatitra vola tao amin’ny banky ao an-toerana ny sabotsy 4 avrily 2026, tamin’ny 9 ora maraina, lasa teo. Voaroban’izy ireo, tamin’izany, ny vola mitetina 17 tapitrisa Ar sy ny moto iray marika Cygnus. Nivoaka ny tranombarotra iray teo amin’ny cité Advantista Amboloma­dinika ary nikasa hihazo ny banky ny lehilahy iray, mpiasa irakiraka, no narahin’olon-dra­tsy. Niton­dra moto izy ary na­petrany tao anaty seza ireo vola. Nosaka­nana jiolahy roa nanao taingin-droa tamina moto izy rehefa lasa lavitra ilay toerana ni­aingana. Nam­ba­nan’izy ireo tamin’ny basy poleta avy ha­trany. Nasainy niala teo ambonin’ny moto ilay lasibatra ary nanaiky moramora noho ny tahotra. Vokany, lasan’ireo olon-dratsy ny moto niaraka tamin’ireo volabe tao anatiny. Nikasa hanohitra izy saingy tsy sahy rehefa nahita fa basy tena izy no teny amin’ireo olon-dratsy. Nambaran’ity lasibatra fa basy mitovy amin’ireo fampiasan’ny mpitandro filaminana ny basy nentin’ireo olon-dratsy.
Nitsoaka nihazo ny lalana beton mivoaka any amin’ny tsenan’Ambolomadinika izy roa lahy mpangalatra taorian’izay.

Sajo

Tontosa teny amin’ny Lapan’ny Teny tonga nofo Ambatobe, omaly, ny fikaonandoham-paritry ny Polisim-pirenena eto Analamanga. Natao hanamafisana ny rafitra sy ny politikan’ny fitandroana filaminana maharitra izany.

“Ahoana ny endriky ny Polisim-pirenena amin’ny taona 2036”, io ny lohahevitra nodinihina nandritra izany. Natao hanamafisana ny rafitra sy ny politikan’ny fitandroana filaminana maharitra ary hanomezana torolalana hentitra amin’ny fihavaozana sy fanavaozana ny fomba fiasa ho an’ny Poli­sim-pirenena ny hetsika. «La­haram-pahamehana ny fametrahana ny fandriampahalemana maharitra amin’ny ankapobeny», hoy ny contrôleur général de police Tsara­mo­nina Ravony Jean Victor, Tale jeneralin’ny Polisim-pirenena. Tanjona ny hamahana ny olana mahatonga ny elanelana eo amin’ny vahoaka sy ny polisy. Eo koa ny hanatsarana hatrany ny fomba fiasa, hamaly tokoa ny hetahetan’ny vahoaka sy hahafahana miatrika ny ambana tsy fandriampahalemana ary hirosoana amin’ny matihanina hatrany. « Andraikitra iombonana ny filaminam-bahoaka, ary fototra mampahomby ny fametrahana fandriampahalemana maharitra ny fiaraha-miasa eo amin’ny Polisim-pirenena sy ny vahoaka », hoy ihany izy.
Nitarika ny fotoana ny commissaire principal de police Rafalimanana Alain Adonis, Talem-paritry ny filaminam-bahoaka Analamanga. Nano­trona izany ny Tale jeneralin’ny Polisim-pirenena, ny contrôleur général de police Tsaramonina Ravony Jean Victor sy ireo manam-pahefana ary tomponandraikitra maro. Marihina fa efa nahatontosa ny fikaonandoham-paritra avokoa ireo Fitale­avam-paritra rehetra manerana ny Nosy. Hisy ny fandravonana ny ventin-kevitra rehetra ary hisy ny tatitra mahakasika izany.

Mino

Heno sy hita anatin’ilay rakitsarin’ny «Voronkely hary elatra » an’ny tarika Feo Gasy i Rado Rajaonarison. Zanak’i Fafah Mahaleo izy ary anisan’ireo mandrafitra ny Mahaleo Taranaka. «Izay aho vao tafaraka tamin’i Rado fa tena latsa-dranomaso aho tamin’ny fandraisam-peo. Nandimby an-drainy izy na amin’ny feo na ny maha olona. Mino aho fa mizotra mankany ity fiarahana ity», hoy i Erick Manana, nandritra ny fihaonany tamin’ ny mpanao gazety, omaly.
Araka izany, anisan’ireo handrafitra ny tarika Feo Gasy eny an-tsehatra, mandritra ny seho hatao rahampitso, etsy amin’ny Lapan’ny fanatanjahantena Mahamasina, i Rado. Hanampy azy ireo koa ny tarika mpanao hiragasy Rasoalalao Kavia, tarihin’i Solofo Gasipira. «Tsy fantatro izay ho faharetany sy ny isan’ny hira ho vita, fa ny azoko antoka dia hahafinaritra, ho feno fihetseham-po io fotoana io. Hahatsiarovanay ihany koa ireo namana tato amin’ny Feo Gasy efa lasa mialoha, ry Rakoto Frah, Fafah, Bariliva ary i Sata izy ity», hoy hatrany i Erick Manana. Mbola eo kosa ireo namany hatrizay toa an’i Kolibera, Benny, Nini, Donné ary i Jenny, mazava loatra.
« Navadika ho tolo-tanana ho an’i Honorat ny hetsika, satria tena marary izy. Ny vola azo tadiavina foana fa aleo aloha manampy ny namana mila fitsaboana », hoy ny nambaran’ny tomponandraikitra ao amin’ny Louvto Company, izay mpikarakara ny seho.

Zo ny Aina

Tafaraka ny samy andrarezin’ny fitendrena gitara. Hiray sehatra i Teta sy i Chrysanto. Samy nitrandraka zavatra maro momba ny gitara sy ny hira malagasy.

Fampisehoana tsy fahita firy. Teta sy Chrysanto, samy havanana amin’ny fitendrena gitara. Samy nanao fikarohana lalina momba ny fampiasana sy famolahana ity zavamaneno vahiny ity ho azo hitendrena ny hira malagasy miainga avy any amin’ny fototra. Tafaraka eny an-tsehatra, ao amin’ny Institut Français de Madagascar, etsy Analake­ly, izy ireo ny zoma 17 avrily izao, manomboka amin’ny 7 ora hariva, ao anatin’ilay seho « Guitares de Madagascar ».
I Teta, zanak’Ampanihy, niaina tao anatin’ny tsapiky. Niainga hatrany amin’ny fahazazany no efa zatra miatrika ireo lanonana samihafa tany amin’iny faritra atsimon’ny Nosy iny, niaraka tamin’ny rainy sy ny rahalahiny. «Mpi­tendry gitara manana rantsan-tanana sy fomba fitendry miavaka sy mahavariana», hoy ny Malagasy sy vahiny mpahay mozika nahita azy nitendry.
I Chrysanto, avy ao Ambo­vombe. Sokajian’ny mpahay mozika ao anatin’ny mpitendry gitara andrarezin’ny faritra atsimon’i Madagasi­kara. Nandalina sy mahafehy tanteraka ny rodoringa. Nampi­velatra izany tamin’ny fikarohana momba ny « folk » sy ny « jazz ». Nanomboka ny taona 2007, anisan’ny mpikambana tao amin’ny Ny Malagasy Orkestra. Efa niakatra sehatra iraisam-pirenena maro.

HaRy Razafindrakoto

Nahavita fiofanana ireo mpanabe olon-tsahala (JPEU) eny amin’ny oniversiten’Antananarivo. Mpianatra 140 no niofana nandritra ny hateloana momba ny ady amin’ny fanilikilihana mifandraika amin’ny VIH/Sida eny amin’ny tontolon’ny oniversite. Hanentana sy hanao fitiliana ny tsimokaretina izy ireo ka hanomboka amin’ny fanentanana ny mpianatra eny amin’ny lalam-piofanana samihafa ny asa. Nanohana ny fanofanana ny minisiteran’ny Fahasalamam-bahoaka, ny Fandaharanasa nasionaly miady amin’ny VIH, ny UNFPA ary ny Formation professionalisante en travail social et développement.
Nisokatra tamin’ny fomba ofisialy ny taom-pianarana ao amin’ny “Annexe Université d’Antana­narivo-Région Bongolava” (AUARB) ao amin’ny distrikan’i Tsiroanomandidy, Faritra Bongolava, tamin’ity herinandro ity. Nambaran’ny minisitra mpiahy fa hampidirina ao anatin’ny tetibola asiam-panitsiana (LFR) ny fanamafisana ny fotodrafitrasa sy ny fanomezana “Postes budgétaires” ho fampandehanana izany. Nanamafy koa ny filohan’ny Oniversiten’Antananarivo fa tsy ho latsa-danja amin’ny kalitaon’ny fampianarana ao amin’ny oniversiten’Anta­nanarivo ny ao amin’ny AUARB.
Manohy ny fanesorana ireo kioska tsy ara-dalàna, amin’ny fomba ara-drariny sy manaja ny dingana re­hetra ny Kaominina Antananarivo Renivohitra. Mety hampidi-doza ho an’ny rehetra sady manimba ny endriky ny tanàna ny fanorenana tsy manara-dalàna. Anisan’iza­ny ireo kioska tsy nahazo alàlana izay mitombo isa eto Anta­nanarivo Renivohitra. Mibahana ny lalan’ny mpandeha an- tongotra na miorina eny ambony lakandrano sy tatatra.