Rasoalalao Kavia. Ana­rana tropy efa fanta-daza amin’ny hiragasy, izay mbola hitombo laza manomboka eto. Izy ireo no tena nampiaina sy nampiavaka ny fampisehoan’i Erick Manana sy Jenny ary ny tarika Feo Gasy, nandritra ny fampisehoana tetsy Maha­masina, omaly. Ilay doboka amponga sy jijin-dokanga toa ireny eny an-kianja ireny mihitsy no nentina niakatra ny Lapan’ny fanatanjahantena, ka nanaingo ny fampisehoana. Nanaraka taorian’ izay ny « Zakeliny Mama », nampitsangana ny iray lapa !
Fa tsy izay ihany akory ny fotoana nafana. Teo koa ny « Mananjary », niakaran’ i Rado an-tsehatra voalohany niaraka tamin’ny tarika Feo Gasy, izay tena nampihetsi-po ny rehetra. Toy ny mbola eo i Fafah, amin’ny alalan’ity zanany izay nanaraka ny lalany. Niaraha-niredona avokoa ry « Fa tsarotsaroako », « Fiha­vanana Malagasy », sns.
Ankoatra an’i Rado, nankasitrahan’ny iray lapa ihany koa ny talentan’i Jenny. Voafehiny ny mozika malagasy, na amin’ny lokanga, sodina, valiha na hira. Ao anatiny mihitsy, hany ka mendrika azy ny nanolorana ny mariboninahitry ny kanto azy nandritra ny seho. Nanaovana poa-tsatroka ihany koa ireo mpikambana rehetra, na dia tsy nankasitrahan’ny mpijery firy aza ny nanapahana ny fampisehoana.
Ora 4, hira 40 teo ho eo, fa ampy nifampizarana ny kanto. Ny hiragasy niaka-dapa, efa nisy ihany, fa nisy fihetsika iray tsy mbola nataon’i Erick Manana nandritra ny 49 taona niakarany an-tsehatra tao : nitsangana nandihy nanao latsi-tanana izy namarana ny « Fofompofony ihany », ary nosarihiny koa i Jenny, sady nidina ny sehatra. Toa nanome fotoana sahady ny amin’ny fanamarihana ny faha-50 taona an-tsehatra…

Zo ny Aina

Tontosa tetsy amin’ny kianja Makis Andohata­pe­na­ka, omaly alahady ny am­pahefa-dalana hiadiana ny ho tompondakan’i Madagasikara Federal 2, taranja rugby. Tafita hiatrika izany ny Rosa Club de l’Imerina, ny FTAT sy ny RCSA Anosibe ary ny CRAI Am­balavao Isotry. Niady avokoa ny fihaonana. Anisan’ny tena nampitsanga mitoetra ny an’ny Stade sy ny CRAI. Efa tany amin’ny fanalavam-po­toana vao tafavoaka ho mpandresy tamin’ny isa, 53 no ho 47 ny Ambalavao Isotry. Nisa­raka tamin’ny isa mitovy 41 no ho 41 ny roa tonta tao anatin’ny 80 mn nilalaovana. Nitarika hatrany anefa ny CRAI no tratran’ny Stade. Tanteraka ilay 5 mn n’ny Stade, saingy tsy voatazon-dry zalahy ilay zava-bitany ka nitsimbadika ho tombony ho an’ny CRAI.
Efa tany amin’ny minitra farany ihany koa vao nivoaka ho mpandresy ny RCSA raha nidona tamin’ny 3FAI. 20 no ho 19 nisarahan’ny roa tonta. “Afa-bela izahay ary tombony ho anay ny tanjaka. Hiezaka izahay hanohitra izay ho mpifanandrina aminay eo amin’ny manasa-dalana”, hoy ny solombavambahoaka Rafidi­manana Désiré, “demi de mêlée”-n’ny RCSA. Ankoatra izay, resin’ny Rosa, tamin’ny isa 17 no ho 9 ny FBM Bemasoandro Itaosy ary nomontsanin’ny FTAT, tamin’ny isa mavesatra 32 no ho 9 ny JSTA Ambondrona.

Tompondaka

Fandresena iray sy faharesena iray no azon’ny Malagasy, nandritra ny fiadiana ny Hengqin Challenger 2026, taranja basikety lalaovina olona 3. Laharana faha-13 tamin’ny 16 nifaninana ny Ankoay.

Nifarana omaly tao amin’ny kianja mitafon’ny Hengoin Cultural and Art Center, Chine, ny fiadiana ny Fiba 3×3 Hengqin Chal­lenger 2026. Teo ho eo ny vokatra azon’ny Ankoay Ma­da­gasikara, izay nitondra ny anarana Antananarivo, tamin’ity. Laharana faha-13 tamin’ireo ekipa 16 nandray anjara ny Malagasy. Raha tsiahivina, fandresena iray sy faharesena iray no azon’izy ireo, tao amin’ny sokajy “A”. Tsy nahafahan’ny ekipan’Antananarivo, niatrika ny ampahefa-dalana iza­ny voka-dalao azony izany.
Nandresy an’ny Mac Pe­nin­sula tamin’ny isa 21 no ho 14 teo amin’ny lalao voalohany avy eo niondrika teo anatrehan’ny Amsterdam, tamin’ny isa 21 no ho 10. Ams­ter­dam no tafavoaka tao amin’ity vondrona nisy ny Ankoay (Antananrivo) ity satria nahazo fandresena indroa. Tsia­hivina fa niaro ny voninahi-pirenena tamin’ity, ry Livio sy Hasina, ary Anthony, niampy an’i Elly sy i Marco ary i Kanto. Nandrombaka ny laharana voalohany, tamin’ity ry zareo Skyliners (Rainiboto), faharoa i Serbie ary fahatelo mbola alemà, tamin’ny alalan’ny Baskets Bonn. Fahefatra i De Qing (Chine) raha notazomin-dry zareo frantsay ny toerana fahadimy sy fahenina dia ny tanànan’i Bordeaux sy i Toulouse. Fahafito, i Serbie nitondra ny anaran’ny Crvena Zvezda ary fahavalo Kavanda narahin’i Japon na Shinjuku. Fahafolo, i Hangzhou nentin’i Chine. Faha-11, Espagne nitondra ny tananan’i Fuen­girola. Tany amin’ny faha-12 i Amsterdam, firenena niray sokajy tamin’Antananarivo. Tao­rian’i Madagasikara, i Hen­gqin, mpampiantrano ary faha-15 Mac Peninsula. Nita­na ny rambony HK Central (Hong-Kong).

Tompondaka

Tsy voahaja ny lojika teo amin’ny andro faha-12 hiadiana ny ho tompondakan’i Madagasikara, taranja baolina kitra na ny Pureplay Football League (PFL). Resin’ny Uscafoot ny Disciples FC ho an’ny kaonferansy atsimo.

Nitranga ny tsy nampoizina teo amin’ny vokatry ny andro faha-12 hiadiana ny ho tompondakan’i Madagasikara, taranja baolina kitra Pureplay football league (PFL). Fihaonana notanterahina tetsy amin’ny kianja Ala­robia, omaly. Lavon’ny Usca­foot, tamin’ny isa 1 no ho 0 ny Disciples FC Vakinankaratra, izay mitarika vonjimaika, ho an’ny kaonferansy atsimo. Baolina tokana nampidirin’i Dina, teo amin’ny minitra faha-78.
Nahavita ny valinadiny ny ekipan’ny kaominina Antana­narivo Renivohitra. Raha tsiahivina, efa resin’ny Disciples FC, ry zareo nandritra ny lalao mandroso natao tany An­tsi­rabe.
Niady tanteraka ny lalaon’ny roa tonta, saingy tsy tao amin-dry zareo Disciples FC ny vintana tamin’ny famonoam-baolina. Maromaro ny baolina azon’izy ireo nanoloana ny tsato-by saingy tsy nety nikobana ny haraton’ny Usca­foot. Nahazo “penalty” ihany koa ny Disciples FC teo amin’ny fizaram-potoana voalohany. Tsy tafiditr’i Fabrice ny baolina ka nivaly tany amin-dry zareo. Tsy nampiova ny filaharana ankapoben’ny vondrona izany, mbola mitarika hatrany ny ekipan’ny faritra Vakinakaratra. Hampiantrano ny Antimo Record avy any Atsimo Andrefana ao amin’ny kianja Velodrome ity farany amin’ny sabotsy ho avy izao. Teo amin’ireo vokatra hafa, lavon’ny Elgeco Plus, tamin’ny isa 3 no ho 0 ny COSPN.

Tompondaka