Ahenoina lohahevitra maro ny hira ba gasy. Ao ny fitiavan’olon-droa, lahy sy vavy, hanina ilay tanàna nahabe, vohitra niandohana. Tsy vitsy kosa ireo maneho fahanginana sy toreo.

Hiavaka tsy tahaka ny nahazatra hatramin’izay ny lohahevitra, hiompana sy hanome sehatra kokoa ireo hira ba gasy mitoreo. Na izany aza, hisy ny lohahevitra hafa, araka ny nambaran’ny filohan’ny Se­hatra Ba gasy. Atrikefa tontosaina ny 4 avrily izao, manomboka amin’ny 2 ora sy sasany tolakandro, ao amin’ny efitrano malalaky ny trano fiantohana Aro etsy Antsahavola.
Anisan’ireo hira omanin’ireo handray anjara amin’ity atrikefa ity ny: «Nilentika re ny masoandro», «Mivalo aminao», «Dia veloma ry Said Omar», izay samy sanganasan’i Naka Rabemanantsoa avokoa. «Hangina ny kamory» (Justin Rajoro), «Aiza ny tany tsy diavim-pitia» (Andrianary Ratianarivo), «Henoy ry Da­da» (A. Ratianarivo), «Maty ilay masoandro» (Samuel Rahamefy). «Dobla sento» (Naka Rabemanantsoa), «Di­so làlana» (Andrianary Ra­tianarivo), «Lasa tokoa re» (Andrianary Ratianarivo), «R’ilay otrikafon’ny foko» (Therack), sns. Hohiraina
amin’io fotoana io ihany koa ireo hira ba gasy marobe maneho toreo fahanginana.
Ankoatra ny atrikefa, hisy hatrany ny sehatra malalaka ho an’izay te handray anjara amin’ny fihirana sy ny fiten­drena, ho fifanakalozana sy fifampizarana fahaiza-manao, ho fampivoarana sy fampivelarana ny talentan’ny tsirairay sy ny ba gasy.

HaRy Razafindrakoto

Nomarihina teny amin’ny EPP Vohibola Ampandrana, omaly, ny Andro maneran-tany hankalazana ny fanentanana sy fampahafantarana momba ny autisme, antsoina hoe «olona hafakely», eto amintsika. Nanamarika izany ny fitokanana ny tranon’ny autisme, ahitana efitrano roa, ao anatin’ny EPP. Fandrai­sana anjara avy amin’ny minisiteran’ny Fanabeazam-pirenena ho fampisitrahana ny zo hianatra ho an’ny ankizy hafakely izy io. Misy ny toerana fandraisana ny ankizy hafakely fa mitaky sarany, matetika mavesatra ho an’ny ray aman-dreny. “Eo anivon’ny EPP, sekolim-panjakana, mihena ny sarany ho an’ny ray aman-dreny satria tsy handoa hofantrano ireo fikambanana handray an-tanana ireo ankizy. Tanjona ny hananan’ny ankizy fahaleovan-tena ka rehefa voafehiny izay dia afaka hisitraka fampiofanan’asa izy ireo”, hoy ny talen’ny fampianarana tsy manara-drafitra ao amin’ny minisiteran’ny Fana­beazam-pirenena, i Mamba Dieudonné. Manerana an’i Madagasikara, misy sekolim-panjakana 15 manana «classe integrée passerelle» afaka mandray ireo zaza manana fahasembanana mavesatra. Toerana nandraisana ny ankizy manana toe-tena trisomique nanomboka ny taona 2024 ny eto amin’ny EPP Vohibola ary hiampy ireo ankizy autiste manomboka izao. Tanjona ny hisian’ny sekoly vaovao afaka handray toy izao isan-taona.
Anisan’ny mpanohana ny fikambanana Autisme Mada­gascar ny orinasa Colas, tao anatin’ny telo taona izay. “Teo ny fampitaovana ho an’ny ankizy manana toe-tena hafakely amin’ny faritra maromaro sy ny tranon’ny autisme ao amin’ny EPP Vohibola”, hoy ny solontenan’ny orinasa, Ra­harimalala Rojo.

Vonjy

Nitsidika ny Ivontoerana nasionaly misahana ny famokarana fitaovana pedagojika sy didaktika (Cnapmad) ny delegasionina notarihin’ny minisitry ny Fanabeazam-pirenena Rajaonarison Sendra Nirina, omaly. Ivontoerana iray eo ambany fiahian’ny minisiteran’ny Fanabeazam-pirenena, manana traikefa 42 taona, ary mamelona mpiasa manodidina ny 150 isa ny “Cnapmad”. Izy ireo izay miandraikitra ny famokarana ny fitaovana didaktika sy pedagojika ; ny fanamboarana ny fanaka ho an’ny sekoly; ny “verrerie de laboratoire” ary ny fivarotana ireo vokatra ireo. Nisy ny fitsidihana ireo sampandraharaha rehetra eo anivon’ny Cnapmad, ahitana ny imprimerie, Fabrication et maintenance, Administratif et affaire financier ary ny Commercial et Marketing izay notarihin’ny tale jeneraly sy ireo tale tsirairay avy niaraka amin’ireo mpiasa rehetra.
Nandritra izany ihany koa no nihainoana ny hetahetan’ireo mpiasa sy mpitantana. Nanome toky ny minisitra fa hitondra vahaolana mifandraika amin’izany. Matetika misy olana noho ny tsy fahazoana karama ara-potoana sy ny disadisa eo amin’ny mpitantana ny mpiasa.

Vonjy

Ahafahana misoroka ny vohoka tsy nirina, mitondra amin’ny fanalan-jaza sy fahafatesana, ny fizarana fahalalana ho an’ny ankizy sy ny tanora momba ny fanabeazana ara-pananahana.

Taorian’ny famoahana ny vokatry ny fanadihadiana nasionaly momba ny fandrindrana ny fiainam-pianakaviana, taona 2024-2025, nisongadina fa tandindomin-doza ny fahasalaman’ny tovovavy eto amintsika. Adolan­tsento 15- 19 taona avokoa ny 17% amin’ireo reny mamoy ny ainy noho ny vohoka tsy nirina sy ny fahasarotana noho ny fanalan-jaza eny anivon’ny hopitaly. Manentana amin’ny hametrahana fanabeazana ara-pananahana feno ny Tahirin’ny Firenena mikambana ho an’ny mponina (UNFPA) hanampiana ny ankizy sy ny tanora hahazo izany mifanaraka amin’ny taonany. Amin’izao fotoana, tsy azon’ny mpisehatra atao ny manao fanentanana momba ny fananahana ara-pahasalamana sy ny fandrindrana fiainam-pianakaviana eny anivon’ny sekoly, taorian’ny naoty navoakan’ny minisiteran’ny Fanabeazam-pirenena, ny taona 2023. Manambara ny naoty fa ny tsy firosoana
amin’ny firaisana ara-nofo no lalantsaina voizina any an-dakilasy, ahazoan’ny ankizy manohy ny fianarany. Ny fandaharanasa fanabeazana ho an’ny fiainana mirindra (EVH) no entin’ny mpanabe isan-tsokajiny mampita sy mitaiza ny ankizy, ny zatovo sy ny tanora mpianatra. Manomboka amin’ ny garabola ny fanabeazana ka hatrany amin’ny fahazoana ny diplaoma bakalorea.
Ankoatra ny fanabeazana ara-pananahana feno, tolo-kevitra taorian’ny fanadihadiana nasionaly koa ny faha­zoan’ny zatovovavy mitondra vohoka na koa niteraka miverina an-dakilasy. Tsy afaka misitraka fampianarana intsony kosa anefa ilay tovovavy raha niditra tamin’ny fanambadiana ara-panjakana na araka ny fomba, araka ny naotin’ny minisitera ihany satria mifanohitra amin’ny foto-kevitry ny minisitera izany.

Vonjy