Marobe ireo olona tsy misitraka fitsaboana ara-dalàna amin’izao fotoana izao, noho ny fahasahiranana. Mano­loana izany, mandalo eto Antananarivo, manome fitsaboana maimaimpoana mandritra ny telo andro, ireo dokotera miisa enina avy amin’ny ONG Humanity First avy any Alemana, tarihin’ny dokotera Wjahat Waraich. Fiaraha-miasa amin’ny miziolomanina Ahmadiyya no ahafahan’izy ireo manatanteraka ny fitsaboana eny amin’ny foiben-toeran’ny Ahmadiyya Andava­mam­ba. Dokotera manam-pahaizana momba ny fo, ny taolana, ny aretina mahazo ny vehivavy ary ny aretina amin’ny ankapobeny izy ireo. « Olona maro no hotsaboina sy omena fanafody amin’ny fandalovanay eto amin’ny foiben-toeran’ny miziolomanina Ahmadiyya. Maimaimpoana ny fitsaboana satria hisitraka fitsaboana avokoa ny olona rehetra na sahirana aza izy ireo. Ireo olona sahirana ireo indrindra no tena entaninay ho avy amin’izao fandalovanay izao », hoy ny fanazavan’ny dokotera Wjahat Waraich. Efa nisy ny fitsaboana maimaimpoana tany amin’ny faritra, toa an’i Fianarantsoa, Melaky ary Toliara, fa anjaran’ny eto Anta­nanarivo indray amin’ity manaraka ity ka haharitra telo andro izany. Nohamafisin’ny mpitarika ny miziolomanina Ahmadiyya, ny misionera Ahmed Mujeeb, fa fanampiana ny olona rehetra tsy ankanavaka izao fitsaboana ataon’izy ireo izao. Tsy misy fanavahana na ara-pivavahana na ara-pinoana na ara-bolon-koditra na ara-pirazanana na ara-piaviana. « Fitiavana ho an’ny rehetra ary tsy misy fankahalana na iza na iza », hoy izy. Marihina fa izany rahateo koa ny tarigetra efa napetraky ny Ahmadiyya rehefa manao asa sosialy toy izao.

Jean Claude

Ao anatin’ny fankalazana ny iray volan’ny fiahiana ara-tsosialy ny fanjakana, amin’ny alalan’ny minisiteran’ny Mponina sy ny firaisankina. Fomba fiasa matihanina sy maharitra no tanjon’ny Fanavaozana.
Tsy mijanona amin’ny fanampiana vonjimaika intsony ny vina fa miatrika ny fototry ny fahantrana mba hanatsarana ny fari-piainan’ny mponina sy hampitomboana ny fahafahan’ny vahoaka miatrika ny sedra eo amin’ny fiainana.
Zava-dehibe amin’ny fiahiana ara-tsosialy ny fisian’ny rejisitra sosialy tokana (RSU). Tokantrano maherin’ny 2,6 tapitrisa, ankehitriny, no voarakitra anatin’ny RSU manerana ny Nosy.
Fitaovana sy paikady enti-mandrindra sy manatsara ireo fandaharanasam-panjakana, indrindra ireo tetikasa fiahiana ara-tsosialy ho amin’ny fampivoarana ny maha olona, ny RSU. Manampy sy manamora ihany koa ny famantarana ireo tokantrano tena marefo mba hiantohana ny fahazoan’izy ireo misitraka ara-drariny sy mitovy lenta ireo fandaharanasa sosialy.
Tanterahina manerana ny distrika 99 ny fisoratana anarana faobe hatramin’ny volana desambra 2026 mba hahatrarana ny tanjona 100% amin’ny fampidirana ny tokantrano rehetra.

Tatiana A

Telo volana taorian’ny fandravan’ny rivodoza Gezani vao tonga eo anivon’ny oniversiten’i Barikadimy, Toamasina, ny fanitso miisa 2 772 isa hanafoana ny tranon’ny mpianatra “Conaco” miisa 22.

Misy kojakoja feno hampiasaina miaraka amin’ny fanitso: faîtière galva miisa 440, cornier galva miisa 4 400 sy loko izay mitotaly 487 405 600 Ar. Niainga tamin’ny fihaonan’ny vondrona mpianatra tao Barikadimy tamin’ny filoha lefitry ny Ante­nimierampirenena misahana ny faritany Toamasina, Razara Pierre, no nahitana ny fanampiana tamin’ny alalan’ny tetikasa Farimbona. Ny BNGRC kosa no niantoka ny fahatongavany tao amin’ny campus Barikadimy. Avy amin’ny fangatahan’ny mpianatra izay nihaona mivantana tamin’ny VPan faritany Toamasina no nahazoana ny fitaovana fanarenana satria zava-dehibe ny fifampiresahana, araka ny nambarany. Ho an’ireo tranon’ny mpianatra miisa 22, ny mpianatra ihany no hametraka ny tafo satria tsy maintsy mandroso ny asa fanarenana.
Amin’ny ankapobeny, na­hatratra hatramin’ny 95% ny fahasimban’ny fotodrafitrasan’ny oniversiten’i Toamasina, ahitana birao, efitrano fianarana, tranon’ny mpianatra, raha ny nambaran’ny filohan’ny oniversite, Dr Razanakolona Diny. Nohamafisiny fa nisy fiaraha- miasa tamin’ireo mpiara-miombon’antoka maro na­narenana izany, toy ny seranan-tsambon’i Toamasina, nandray an-tanana ka trano fianarana 10 no efa vita tafo. Ny filohan’ny Fanavaozana ny Repoblikan’i Madagasikara ihany koa nisahana trano 10, tamin’ny alalan’ny ONG Soa. Ny orinasa Orange nikarakara ny trano famakiam-boky sady nametraka box famahanana finday sy Wifi maimaimpoana ho an’ny mpianatra ary nambarany fa ampiana rihana iray ity trano famakiam-boky ity.
Ny trano rihana telo kosa dia ny Fonds commun de l’éducation (FCE) no hisahana ny fanamboarana azy. Mito­taly 78 ny fotodrafitrasan’ny oniversiten’i Toamasina niharan’ny fahasimbana ka ny 30 amin’ireo no mbola tsy nisy fanarenana. Nilaza hanohana ny banky foibe fa saingy tsy hita taratra hatreto

Sajo

Tsy azo sakanana intsony. Saika mampiasa na ampiasana ny « intelligence artificielle » na ny « IA » avokoa ny sehatra rehetra (fahasalamana, soratra, zavakanto sy kolontsaina…). Ho an’ ny firenena matanjaka, efa notezaina hahay mandray sy mampiasa azy io ny olona ao aminy. Vao 12 taona monja ny zaza, efa mahafantatra sy mahay manavaka ny tena izy sy ireo namboarina na nampiasana ny « IA ». Amin-dry zareo, fitaovana hoenti-ma­nampy eo amin’ny fiainanana andavanandro ny « IA »
Ho an’ny firenena «adalam-pandrosoana», loza mi­tatao ho azy ireo izy io. Mafy sy matanjaka ny fiantefany eo amin’ny kolontsaina sy ny zavakanto. Manom­boka ny mpamoron-kira sy ny mpihira fa simbain’ny « IA » ny sanganasan-dry zareo, satria, very tanteraka ny fototra.
Ao anefa ireo faly, satria, « hafa mihitsy ny fandrenesana azy izany ». Fihetsika izay maneho avy hatrany fa sady tsy nomanina handray sy hampiasa azy ity (IA) ilay firenena sy ireo mponina ao aminy no tsy mahafantatra ny kolontsainy akory ka mi­antsampy amina kisarisarin-javatra.
Raha maniry fatratra ny fihenan’ny fampiasana « IA » ao aminy ireo firenena ma­tanjaka sy mandroso. Misisi­ka mafy sy te hampitombo fatratra ny fiankinandoha amin’io kosa ireo firenena mahantra sy fadiranovana.

HaRy
Razafindrakoto

Fahombiazana ny fifaninanana fanokafana ny taom-pikatrohana 2026, ho an’ny ligin’Analamanga, taranja Ka­rate, notontosaina ny faran’ny herinandro teo, teny amin’ny Kianja mitafon’Anko­rondrano. Nahavory mpijery sy mpifaninana an-jatony ny Ligy Tour­nament Karate eto anivon’ Ana­lamanga. Nahatonga so­lontena avokoa ireo seksionina 8 mandrafitra ny ligy ary feno hipoka ny teny Ankoron­drano. Tetsy ankilany, niakatra ihany koa ny haavo teknikan’ny mpikatroka, indrindra ireo katitakely. Tsiahivina fa ny sokajy latsaky ny 14 taona sy ny sokajy Vétérans no nifaninana tamin’ity fanombohana ity. Mbola ho avy ny fifaninanana rezionaly handraisan’ny sokajy rehetra anjara, araka ny fanazavan’ny filohan’ny ligin’Analamanga, Rakotoma­lala Pierrot. Aorian’ny fifaninanana rezionaly, miomana amin’ny fifaninanana nasionaly ny ligin’Analamanga. Hisy ihany koa ny fiofanana ary anisan’izany ny fandraisan’izy ireo anjara amin’ilay fiofanana eo anivon’ny federasionina, natokana ho an’ny “cadres”.

Mi.Raz

Notontosaina nanomboka ny sabotsy teo, teny amin’ny Kianjan’ny CFFA Iavoloha, ny fihodinana faharoa, fiadiana ny amboaran’i Madagasikara, Yas Coupe. Samy nangoron-damba amin’ity fifanintsanana ity ny Disciples FC Espoir sy ny Cosfa II. Marihina fa lavon’ny Valahara tamin’ny isa 3 no ho 2, ny Disciples FC Espoir, raha toa ka resin’ny CFT 3FY tany amin’ny fandakana “tir au but”, 5 no ho 3, kosa ny Cosfa miaramila, rehefa nanao ady sahala 3 no ho 3.

Voahosotra ho tompondakan’i Espagne, La Liga, ny FC Barcelone, afakomaly, tao amin’ny Kian­jan’ny Camp Nou. Resin’izy ireo tamin’ny isa 2 no ho 0 ny klioba faharoa, Real Madrid FC. Tsy nanohitra mihitsy ny Real Madrid tamin’ity fifanandrinan’ny roa tonta ity, ary mora tamin’ireo mpilalaon’ny Barça ny naka ny fandresena teo an-jaridainany. Tsara marihina fa misedra ny taona fotsy indray ny Real Madrid, mandritra ity taom-pilalaovana ity.

Hotanterahina ny 22 hatramin’ny 24 mey izao, eny amin’ny tanàna Soa Ambohimanga, ny fiadiana ny amboaran’i Madagasikara sy Beach Volley, sokajy U19 sy Seniors, lahy sy vavy, taranja volley ball. Fihodinana voalohany ny fifaninanana beach volley ary any Toamasina kosa no hanatanterahana ny fihodinana faharoa. Efa misokatra ny fisoratana anarana.

Hotanterahina any Nairobi Kenya, ny 21 hatramin’ny 31 mey ho avy izao, ny fiadiana ny ho tompondakan’i Afrika, taranja baolina lavalava, ho an’ny sokajy vehivavy, vondrona A. Araka ny fanadihadiana natao tamin’ny loharanom-baovao iray eo anivon’ny Federasionina malagasin’ny Rugby, mety hivoaka amin’ity herinandro ity ny lisitry ny mpilalao handrafitra ny Makis Ladies.
Raha ny vaovao voaray farany, manodidina ny 28 eo ny mpilalao hoentina any Kenya, hiaro ny voninahi-pirenena. Raha ny fikarohana natao, omaly, hifandona voalohany amin’ny Malagasy ny ekipan’i Afrika Atsimo. Nambaran’ny mpanazatra Andriamaro Maminarivo Hajasoa fa nohamafisina ny resaka tosika eo amin’ireo “avant”.
Tsara ny mampahatsiahy fa ankoatra an’i Afrika Atsimo, hifandona amin’ny Makis Ladies koa i Kenya, mpampiantrano, sy i Ouganda. Tamin’ny taon-dasa, teo amin’ny laharana farany no nisy ny ekipa nasionaly malagasy, ary amin’ity raha mbola ratsy ny vokatra azon’izy ireo any an-toerana, mivarina any amin’ny sokajy “B”. Izay laharana voalohany kosa no hiatrika ny “WXV II” ary manao ny “WXV III” ny faharoa.

Fitia Randria

Feno ny fandaharam-potoanan’ny Federation sport automobile malagasy (FSAM) ho an’ny taom-pifaninanana 2026. Dimy ny isan’ny rallye hiadiana ny ho tompondakan’i Madagasikara, raha miisa 7 ny eo amin’ny Karting. Ankoatra izay, eo koa ny “course de côte” sy ny Slalom.

Nivoaka ny fandaharam-potoana ho an’ny Fe­de­ration sport automobile malagasy (FSAM), ho an’ny taom-pilalaovana 2026. Miisa dimy ny rallye hifaninanana amin’ity. Hanomboka izany ny Rallye karakarain’ny klioba FMMSAM, hatao ny 29 sy 30 mai ho avy izao. Ha­naraka azy ny an’ny Asacm, hotanterahina ny 19 ka hatramin’ny 21 jona. Any amin’ny volana aogositra indray ny rallye karakarain’ny GO Jang ka any Mahajanga ny hanaovana azy, ny 13 sy 14 ary ny 15 aogositra. Ny 3 sy 4 oktobra ny an’ny Asa Tana ary hamarana izany ny hataon’ny Federasionina (FSAM). Ho­tontosaina ny 23 ka hatramin’ny 25 oktobra izany. Ankoatra izay, misy 7 ny isan’ny fihaonana eo amin’ny Karting. Efa nisantatra izany ny an’ny SRK, natao ny alahady lasa teo. Ny 5 jolay ny dingana manaraka sahanin’ny SRK hatrany. Ny 30 aogositra ny an’ny TFM ary ny 12 sy 13 septambra kosa ny manaraka ka iray amin’ny Run Mada na MSA na SRK no hikarakara an’io. Ny 11 oktobra ary ny 22 novambra hisy ny Karting Trophées. Samy hataon’ny klioba SRK avokoa ireo hetsika roa ireo. Hamarana azy ny an’ny FMMSAM, hatao ny 13 desambra.
Miisa 4 ny Slalom dia ny an’ny MSA, ny 6 sy 7 jona, arahin’ny Tac’s, ny 25 sy 26 jolay. Avy eo ny FMMSAM, ny 19 sy 20 septambra. Hama­rana azy ny an’ny ACCT, ny 7 sy 8 novambra. Eo koa ny Run izay misy dimy sy ny “course de côte” ka iray natao tamin’ny tany, izay efa tontosa ny 11 sy 12 avrily lasa teo. Efatra kosa ho tontosaina amin’ny “asphalte”. Mitotaly efatra ny Slalom, hatao amin’ny tany. Misy ihany koa ny Run sy ny Esport. Raha voahaja avokoa ny fandaharam-potoana, hatao ny 20 febroary 2027 ny fizarana ny amboara ho an’ireo tompondakan’i Madagasikara 2026.

Tompondaka

Tafiditra ao anatin’ny politikam-pampandrosoana entin’ny Vovonana « Ra­ssem­blement des agriculteurs libres et indépendants » na Rali, ny fanomezan-danja ny mpiantsehatra rehetra anatin’ ny tontolon’ny fambolena sy fiompiana. Tanjona ny hisian’ny fifandanjan’ny tombontsoa azon’ny tsirairay. Manomboka amin’ny fanovana ny toe-tsaina izany.
Andaniny, ny tantsaha tsy iankindoha amin’ireo voalaza ho mpiara-miasa aminy. An­kilany, tsy tokony hanao ampihimamba ny mpahazo tombontsoa  mihoapampana. Zava-­dehibe ny fifampitsinjovana sy ny fitsinjarana ara-drariny.
Ankoatra ireo, mipetraka ho elanelam-panahy ny Vovo­nana amin’ny fitadiavam-bahaolana mahakasika ny sedra isan-karazany mampihitsoka ilay seha-pihariana. « Marary tanteraka ny tontolon’ny fambolena sy fiompiana kanefa voalaza ombieny ombi­eny fa 80 % ny Malagasy dia tantsaha.  Manana adidy isika (izahay) amin’ny maha tantsaha hitondra ny anjara birikinay. Efa mipetrapetraka ny sampana amin’ny faritra rehetra manerana ny Nosy, efa misy ny ekipa eny amin’ny distrika », hoy Ralaimahary Linot, filoha nasionalin’ny Rali.
Manentana ny tantsaha mba hivondrona sy hanamafy firaisankina izy.
Miahy tena ny Vovonana izay ivondronan’ny fikambanana sy ny kaoperativa isan-karazany avy amin’ny lafivalon’ny Nosy. « Mbola mijanona ho vovonana 100 % Malagasy izahay. Mipetraka ho mahaleo tena ihany koa, saingy vonona ny hiara-miasa amin’ny fanjakana, izay raiamandrenin’ny tantsaha », hoy hatrany ny filohan’ny Rali Madagasikara.
Misokatra ho an’ny fikambanana, na olon-tsotra, na tomponandraikitra eny ifotony ny Vovonana.

r.r