Ho fanampiana sy ho fikarakarana ny tanora malagasy, nantsangana ny klioba fiofanana baolina kitra, Delta United.
Nambaran’ny teknisianina, Rasoanaivo Titi na ny Coach Titi, fa natsangana ho an’ireo zandry latsaky ny 16 sy ny 18 ary ny 19 taona izy ity. Hisy ny fifantenana manerana ny faritra eto Madagasikara rehefa vita eo ny fanadinana baccalaureat. “Sehatra iray hananganana sy hanangonana ireo tanora manan-talenta, hanosehana azy ireo any amin’ny sehatra matihanina izy ity. Tsy ivontoeram-piofanana fa klioba fiofanana”, hoy ihany ny Coach Titi. Nomarihiny fa natao izao tetikasa izao noho ny fahitana fa vitsy ireo tanora eto an-toerana no milalao any amin’ny sehatra ambony. Tanjon’ity klioba ity ny handefa azy ireo any amin’ireo klioba goavana any Eoropa, aty Afrika sy ireo ekipa matanjaka aty amin’ny faritry ny ranomasimbe Indianina. “Hatao toy ilay klioba Tanà Formation ta­min’izany izy ity. Hampiavaka azy kosa, hotohanana hatrany izy ireo ho tonga any amin’ny sehatra ambony kokoa”, hoy ihany ity mpanazatra ity. Ampahafantarina ihany fa ha­nomboka eto an-dRenivo­hitra ny fifantenana ary hipaka any amin’ny faritra. Rehefa tontosa izany, havondrona eto Antananarivo ireo voatsonga hiatrika ny dingam-pifantenana farany. Handray anjara amin’ny fifaninanam-pirenena eto Analamanga ity klioba ity fa tsy hijanona amin’ny fampiofanana fotsiny.

Fitia Randria

Nifarana ny alahady teo ny fifanintsanana ady laharana hiakarana amin’ny dingana manaraka, ho an’ny « XXL Top 12 ». Tafita hiatrika izany ny ekipan’ny Cosfa, CEA Andranomanalina, Uscar, FTM Manjakaray, tompondaka farany, USA Ankadifotsy, TFA Anatihazo. Araka ny fanazavana azo omaly, miandry ny manasa-dalana avy hatrany ny Cosfa sy ny CEA. Manao lalao sakana hiakarana amin’ny manasa-dalana kosa ireo fileovana fahatelo hatramin’ny fahenina. Raha tsy misy ny fiovana farany, hifandona, ny alahady ho avy izao, etsy Andohatapenaka, ny ekipan’ny kaominina, fahatelo sy ny TFA Anatihazo, fahenina. Ankadifotsy, fahadimy, hifampitana amin’i Manja­karay, fahefatra. Fifanandri­nana andrasan’ny maro ny an’ny USA Ankadifotsy sy ny FTM Manjakaray. Manala vela ny “maitsokely” amin’ity. Hatao amin’io fotoana io ihany koa ny lalao sakana hiakarana Top 12, hihaonan’ny US Che­minots sy ny RCSA Anosibe.

Fitia Randria

Taorian’ny fifaninanana iraisam-pirenena natao tetsy Mahamasina, vaovao mahafaly ho an’ny karate-do malagasy, voaasa amin’ny “Open de Saint Denis” i Madagasikara.

Fahombiazana ny fifaninanana “Coupe international d’Antananarivo” natao teny amin’ny Lapan’ny fanatanjahantena Mahama­sina, ny faran’ny herinandro lasa teo. Tohin’izay, nahazo fanasana avy amin’ny Renio­ney i Madagasikara handray anjara amin’ny “Open de Saint Denis”, hatao ny volana no­vambra. Mariky ny fahaiza-manaon’ny Malagasy mpikatroka izany ary hita fa niakatra ny lentan’ny mpifaninana avy eto Madagasikara nandritra iny fifaninanana iny. Raha hi­verenana ny momba izay, nifampizarana ny vokatra ka samy nahazo anaram-boninahitra ny vahiny sy ny mpampiantrano. Nahafa-po ny vokatra, araka ny nambaran’ny filohan’ny Federasionin’ny karate-do Malagasy, Ratefinana­hary Emile. Tsy nisy rahateo ny olana na teo amin’ny fifaninanana na ny fitsarana. Tan­jona ny hananan’i Madaga­sikara fifaninanana iraisam-pirenena ara-dalàna sy tafiditra anatin’ny fandaharam-potoan’ny Ufak aty amin’ny ranomasimbe Indiana sy ny faritra atsinanana, raha ny fanazavan’ny filohan’ny FKM hatrany. Efa fantatra amin’ny taona ho avy fa hisy ny delegasionina ara-teknika avy amin’ny Ufak hijery sy hitarika ity fifaninanana eto Antana­narivo ity.
Tsiahivina, 324 ny mpifaninana tamin’ity “Coupe Inter­na­tionale d’Antananarivo” ity, nahitana mpikatroka 6 taona hatramin’ny sokajy Seniors.

Mi.Raz

Napetraka tamin’ny fom­ba ofisialy tao Toama­sina ny talem-paritry ny minisiteran’ny Fanavaozana. Voatendry ho amin’izany, ho an’ny faritra Atsinanana, i Boizy Blandine, raha Aldine Bernadette kosa ho an’ny faritra Analanjirofo. Nitarika izany ny minisitra misahana ny Fanavaozana, ny Me Razafi­ma­nan­tsoa Hanitra. «Hiton­dra fanavaozana lehibe eto amin’ny firenena ity minisitera ity ka zava-dehibe takina amintsika olom-pirenena ny fanovana toe- tsaina. Vonona hanova, hitondra ny tsara sy tena hitia ny firenena», hoy izy. Na­tsidiny koa fa ilaina ny fanovana ny lisi-pifidianana mba hametrahana fifidianana lavitry ny hala-bato, hahatongavana amin’ny fananana olom-boafidy araka ny safidim-ba­hoaka. Mba ho filoham- pirenena voafidy ara-demokratika tanteraka no ho eo.
Etsy andaniny, nambarany koa fa mba ho lavitry ny kolikoly ireo sampandraharaham- panjakana rehetra. «Hape­traka ny tomponandraikitra aty hisahana ny fanentanana ifotony hiatrehan’ny rehetra sy andraisan’ny Malagasy rehetra anjara biriky, hitondrany ny hevitra ho amin’ny fikaonandoham-pirenena, hotarihin’ny FFKM», hoy ihany ny minisitra.

Sajo sy Synèse R.

Hotanterahina, anio, ny manasa-dalana voalohany eo amin’ny fiadiana ny ho tompondaka maneran-tany «Mondial 2026». Hifanandrina amin’izany ny La Furia Roja Espagne sy ny Les Bleus France. Vonona ny ekipa roa tonta, saingy samy manana olana eo amin’ireo mpilalaony.

Ho fantatra amin’ity talata ity izay ekipa voalohany hiatrika ny famaranana amin’ny fiadiana ny ho tompondaka maneran-tany “Mon­dial 2026”. Hatao ao amin’ny Kianja Dallas, Arlington ny ankatoky ny famaranana hikatrohan’ny La Furia Roja Espagne sy ny Les Bleus France. Hiendrika famaranana kely ny fihaonana eo amin’ny roa tonta. Na eo aza izany, manana olana amin’ireo mpilalaony avy ny mpanazatra roa lahy, i Deschamps (France) sy i Luis de la Fuente (Espagne). Samy misy mpilalao tompon-toerana maratra manko ka mety tsy ho afaka hiakatra kianja amin’ity lalao manasa-dalana ity.
Raha ho an’i France, tsy nanatrika ny fanazarantena mialoha ity fihaonana ity ireo vodilaharana roa lahy, i Wil­liam Saliba sy i Dayot Upame­cano. Mety ho ao anatin’ireo hijoro ihany anefa izy ireo, raha ny fanambaran’ireo mpitsabo, manaraka ny ekipa. Roa lahy koa no tsy afaka ho an’ny La Furia Roja dia i Robin Le Normand ary i Pedri, izay voadona teo amin’ny lohaliny.
Tsiahivina fa fanintelony amin’izao ny fihaonan’ny roa tonta ka indroa resy ny Fran­tsay. Ity izany no alavela ho an’i France. Hiantehitra betsaka amin’i Mbappé, kapiteniny, araka izany, ny Frantsay. Hitantana ny fihaonan’ny roa tonta, amin’ity, ilay teratany Salvador, i Ivan Barton. Ha­nampy azy ilay mpiray tanindrazana aminy i David Moran sy ilay Nicaragoanina, i An­tonio Pupiro. Mpitsara fahefatra, i Glenn Nyberg avy any Suède.
Ankoatra izay, tsy ho afaka hanatrika ity lalao ity i Emma­nuel Macron, filoham-wpirenena frantsay noho ny fetim-pirenen’izy ireo. Ho tonga any New-York kosa nefa izy raha toa ka tafakatra amin’ny famaranana ny Les Bleus.

Tompondaka

Olana goavana ny fitantanana ny rano amin’izao fotoana izao. Misedra izany ny any amin’ny Faritra atsimo. Zo fototra anefa ny fitsinjarana ara-drariny izany, mahatonga ny fampiasana ny voambolana HAQ KA PANI any Inde.

Tranga iray manamarika ny fitantanana tsy mahomby ny fitantanana ny rano maneran-tany ny ataon-dry zareo ao Pakistan, amin’ny reniranon’Indus, izay ifampizarany amin’i Inde. Raha ny fifanarahana nifanaovan’izy ireo ny taona 1960, nahazo 20% amin’izany ry zareo indianina, ny 80% kosa napetraka ho an’ny pakistanais. Tsy nametraka olana izany tany am-boalohany satria noheverina hiteraka toe-tsaina tomponandraikitra sy vonona hiara-miasa. Nana­mpy trotraka ny tsy fisian’ny mangarahara avy amin-dry zareo nahazo ny ampahan-drano betsaka. Niezaka namoaka ny azy ny indianina, raha tsy nitaky ny hamoahan’ny andaniny ny fandaniany nandritra ny am-polo taonany maro ny ankilany. Tsy nangataka ny antoka ho amin’ny fampiasana izany loharanon-karena izany. Raha ny zava-misy dia manasongadina ny tsy fahombiazan’ny fitantanana ankapobeny sy ny fatiantoka ao anatin’ny fanondrahana. Tombanana ho 47 MAF na manodidina ny 58 lavitrisa m³ izany. Tsy ampy ny fitehirizan-drano, misy tandrevaka ny fitantanana ka mahatonga ny fahaverezan’ny rano any an-dranomasin’ny firenena Ara­bo. Mahatratra 35 MAF na 43 lavitrisa m³ izany.
Manoloana ny olana, ny fanjakana indianina no mizaka ny fatiantoka ka mihevitra izy ireo ny hamerenana ny fitantanana feno aminy ho fanajana ny rariny fa tsy sanatria fibodoana akory. Sady ampiasaina amin’ny fanondrahana ny saha izany no hitrandrahana herinaratra. Ampy ny faharetana nandritra ny fotoana maharitra ka mila miroso amin’ny fanitsiana ny fifanarahana i Inde. ” Tsy misy fandavana na fivadiham-pitokisana izany fa rehefa tsy hajaina ny fototra iorenany, tsy azo ihodivirana ny fanavaozana izany. Mari­hina fa paikady hoenti-manatsara ny fiainan’ny tantsaha sy ho fiarovana ny rano sy ny renirano no antony mahatonga ny tomponandraikitra hiady ho amin’ny fanovana ny fifanarahana..

Rano sy fampihorohoroana
Anisan’ny fositra manome vahana ny asa fampihorohoroana ny fihetsiky ny avy eny am-pitan’ny reniranin’Indus, na avy ao Pakistan. “Tsy afaka miara-mikoriana ny rano sy ny ra”, hoy ny Praiminisitra. Mila fanovana izany satria manimba ny fototry ny fiaraha-miasa sy ny fifanarahana ny fankahalana maharitra. Porofo mivaingana ny asa fampihorohoroana tao Pulwama sy ny tao amin’ny lemak’i Pahalgam. Mila jerena manokana ny hodidina rehetra misy manomboka izao.
Tsiahivina fa manamarika izay fiovana lehibe izay ny rohifiasa nambaran’ny Prai­minisitra tamin’ny taon-dasa, nandritra ny fotoana nankalazana ny fetim-pirenena. ” Ha­nome tombondahiny ny tantsaha amin’ny fampiasana sy fandaniana ny rano izay hananany zo feno. Tsy midika ho fialana amin’ny fifanarahana natao ny fanitsiana ny fifanarahana fa entina mamerina ny tantara, hiala amin’ny fampandringana ny firenena tsy araka ny tokony ho izy, sady fanakanana ny fampiasana mihoa-pefy ny rano ataon’ny sasany izany. Hiaro sy hifehy ny fahaverezan-drano i Inde, hitsinjovana ny tantsaha izay mijaly rano”, hoy izy

Mazava ny hafatra ankapobeny
Hoy Andriamatoa Atul Jain, Filoha teo aloha an‘ny Vaomiera foiben’ny Rano: “Voalohany, hampiasa tanteraka ny anjara ara-dalàna amin’ny rano any amin’ireo faritra sahirana amin’ny rano i India. Faharoa, tsy hanaiky intsony ny rafitra izay tsy voafehy ny tsy fahombiazana sy ny fandaniam-poana tsy voafehy, etsy ankilany. Raha toa ka ny fikasana hametraka teritery artifisialy sy tsy mitombina ara-tsiansa, ny andaniny. Fahatelo, hanamafy ny fizakan-tenany ara-teknika izy ireo, hiantoka fa ny famoronana sy ny fikojakojana ny fotodrafitrasa dia mitohy tsy misy sakana, mifanaraka amin’ny fahalalana ara-tsiansa ankehitriny sy ny fomba fanao tsara indrindra iraisam-pirenena“.

Fanou

« Taona fotsy! » Nahintsan’ny AS Ste Anne teo amin’ny ampahefa-dalan’ny fiadiana ny amboaran’i Madagasikara, « Yas Coupe » 2026, ny Elgeco Plus, omaly, tetsy By-pass. Resin’izy ireo teo amin’ny fandakana « tir aux buts », 5 no ho 4, ny Elgeco Plus, rehefa nisaraka ady sahala, 0 no ho 0, nandritra ny fe-potoana ara-dalàna.
Votso-droa izany ny klioban’ny Elgeco tamin’ity taom-pilalaovana ity. Sady tsy voatanan’izy ireo ny amboaran’i Madagasikara, votsotra teo am-pelatanany koa ny tompondakan’i Madagasikara.
Tsiahivina fa tamin’ny taona lasa, nanao pao-droa, laharana voalohany, tamin’ny fifaninanam-pirenena sy nandrombaka ny amboara nasionaly « Yas Coupe » 2025 ity ekipa avy eto Analamanga ity. Ny ekipan’ny Wagner FC, nandresy tsy niady ny Ajesaia, izany, mifandona amin’ny klioban’ny AS Ste Anne, eo amin’ny manasa-dalana. Ankoatra izay, afa-bela tamin’ny klioban’ny CFFA Andoharanofotsy ny Cosfa miaramila, rehefa nandavo azy ireo, 1 no ho 0, omaly, tetsy By-pass hatrany.
Raha tsy misy ny fiovana, ny FC Rouge sy ny Cosfa no hifandona amin’ny dingana manaraka.

Fitia Randria

Natao ny sabotsy teo, tetsy amin’ny Lapan’ny fanatanjahantena Mahamasina, ny fivoriambe ara-potoana ho an’ny Federasionin’ny karate-do Malagasy. Ligim-paritra 13 amin’ireo 15 misy no tonga nanatrika teny an-toerana. Nisy ny fanambarana nataon’ireto ligy ireto ka ny filoha Boniface no nisolo tena azy ireo. Nambara ofisialy fa miaraka amin’ny federasionina, tarihan’ny filoha Ratefina­nahary Emile, izay ara-dalàna sy manaraka ny rafitra eken’ny iraisam-pirenena izy ireo. Nanamafy izany koa ny « Inspecteur principal de police », Randrianjatovo Marcel, avy amin’ny COSPN fa tsy mbola feno ny fe-potoana fiasan’ity federasionina ity ka mahatonga azy ireo miaraka aminy. Tetsy ankilany,  nanamafy ny filohan’ny FKM, Rate­finanahary Emile, noho ny lainga nafafin’ireo olona nitonona ho nanangana ny « Comité ad’hoc », izay nitondra fanakorontanana teo anivon’ny karate. Nanapa-kevitra ny fivoriambe fa hampihatra ny lalàna velona amin’ireo olona rehetra, na ao anatiny na any ivelany. Hitory azy ireny eny eo anivon’ny MJS sy ny fitsarana. Anisan’ny notapahana nandritra ity fivoriambe ity ihany koa ny hanatanterahana ny fiadiana ny ho tompondakan’i Madagasikara 20­26 any Fianarantsoa, ny 29 oktobra hatramin’ny 1 novambra. Mandritra izany no hanatanterahana ny fifidianana izay ho filohan’ny federasionina.  Mahakasika ity taranja ity hatrany, hitsangana atsy ho atsy ny seksionina eny anivon’ny sekoly fanabeazana fototra sy ny oniversite. Hisy ny fifaninanana natokana ho azy ireo amin’ny 9-10-11 oktobra, eny amin’ny Lapan’ny fanatanjahantena Mahamasina.  Tsiahivina fa nizotra ny faran’ny herinandro teo ny “Coupe internationale d’Antana­na­rivo”. Nahatratra 400 mahery ny mpandray anjara tamin’izany.

Mi.Raz

Mifanenjana amin’izao fotoana izao ny klioba Union des bouliste Manjaka Tokana (UBMT) sy ny Federation sport-boule malagasy (FSBM). Anton’ny olana ny fandehanana miatrika ireo lalao isan-tokony any France.

Tsy miafina amin’ny rehetra intsony, eny na hatrany ivelany aza, ny lamba maloton’ny tsipy kanetibe malagasy. Vaky tanteraka ny ady eo amin’ny klioba UBMT sy ny Federation sport- boule malagasy (FSBM). Raha tsiahivina, tsy vao izao no nisy ny disadisa teo amin’ny roa tonta fa efa hatrany amin’ny fifidianana ny ho filohan’ny FSBM. Anke­hi­triny, misy olana vaovao indray ka nampirefotra ny baomba. Ny tsy fahazoan’ny ekipam-pirenena malagasy “visa”, tokony hiatrehana ireo lalao iraisam-pirenena any France, no nampirehitra ny afo. Vokany, tsy afaka niaro ny anaram-boninahitra teo am-pelatanany tamin’ny “Mondial La Marseillaise” i Madagasi­kara.
Tetsy ankilany, afaka nandefa ny ekipany ny UBMT ka mbola any an-toerana, ankehitriny, miatrika ireo fifaninanana isan-tokony. Namaky bantsilana ity tranga ity i Michou Luc, filohan’ny UBMT, tamin’ny alalan’ny horonantsary nataony ny zoma sy ny sabotsy lasa teo.
Tsy nitsitsy fitenenana izy fa ny tsy fahaiza-manaon’ny tomponandraikitry ny FSBM no tsy nahazoana “visa” fa tsy misy hidiran’ny tenany velively, ka nampitandrina izy. Ny sabotsy lasa teo, teny Ankatso, namaly Randriani­rina Adrien, filohan’ny FSBM, fa mbola manantena ny hivoahan’ny “visa” ho an’ny ekipam-pirenena mba hahafahana mandray anjara amin’ireo lalao hafa izay mbola maro. Mahakasika ny sazy nahazo ny UBMT, tsy ny FSBM no nanao izany fa ny federasionina frantsay, hoy izy, saingy efa nivaha izany ankehitriny. Ny mpitantana ny UBMT kosa manitrikitrika ny hivoahan’ny marina ary mangataka fifanatrehana eo anatrehan’ny mpanao gazety, amin’ny filohan’ny FSBM, amin’ity herinandro ity.

Tompondaka

Fantatra avokoa ireo ekipa 4 hiatrika ny manasa-dalana hiadiana ny ho tompondaka maneran-tany «Mondial 2026 », taranja baolina kitra. Hifandona ny La Furia Roja Espagne sy ny Bleus France ary ny Three lions Angleterre sy ny Albiceleste Argentine.

Miato ny fiadiana ny ho tompondaka maneran-tany amin’ity alatsinainy ity, mialoha ny hiatrehana ny dingana manasa-dalana, rahampitso talata. Ekipa 4 sisa no manohy ny fifaninanana taorian’ny ampahefa-dalana natao ny sabotsy sy omaly alahady. Hanokatra ny lalao ny fifanandrinan’ny La Furia Roja Espagne sy ny Les Bleus France, ao Dallas. Fihaonana anisan’ny hisongadina indrindra ary andrasan’ny rehetra. Hiendrika famaranana kely mantsy izany. Raha tsiahivina ny lalana nodiavin’ny roa tonta mialoha izao ankatoky ny famaranana izao. Nandresy ny Diables Rouges Belgique, tamin’ny isa 2 no ho 1, ny La Furia Roja Espagne. I France kosa nanilika an’i Maroc, 2 no ho 0.
Hanala vela amin-dry zareo espaniola, amin’ity, ny frantsay. Ny fihaonana farany natrehin’ny roa tonta mantsy dia ny manasa-dalana ny «Ligue des Nations UEFA», natao tany Allemagne, ny 5 jona 2025.  Lavon’i Espagnol, tamin’ny isa 5 no ho 4, ry zareo frantsay ka ity no valin’ady ho azy ireo. Hifampitana amin-dry Olisé sy ry Mbappé ary i Dembele i Yamal sy i Pedri. Tsiahivina fa ny La Furia Roja irery no ekipa nidiram-baolina vitsy indrindra, satria iray monja izany.
Ny manasa-dalana iray kosa, hifanandrinan’ny Three Lions Angleterre sy ny Albi­celeste Argentine. Lalao hatao ao Atlanta, ny alarobia 13 jolay 2026. Nandritra ny am­pahefa-dalana, lavon’ny Ang­leterre, tamin’ny isa 2 no ho 1, i Norvège ary efa tany amin’ny fanalavam-potoana kosa vao nivoaka ho mpandresy, tamin’ny isa 3 no ho 1, i Argentine. Ekipa roa tsy mihaona matetika. Efa tamin’ny taona 2005 ny fifanandrinan’izy ireo farany ka nivoaka ho mpandresy, tamin’ny isa 3 no ho 2, i Angleterre, tamin’izay.

Tompondaka