Emblématique , le zébu demeure omniprésent dans la culture de Madagascar

Ho fanomanana ny taom-pilalaovana 2024 sady hanomezana fanazarantena ireo mpilalao badminton, nikarakara “Open”, ny klioba MB2 All. Fihaonana notanterahina ny alatsinain’ny Paka lasa teo, tetsy amin’ny kianja mitafon’ny ANS Ampefiloha.
Nanjakan’ny mpikarakara ny fifaninanana tamin’ity. Lasan’izy ireo avokoa ny fandresena 4 tamin’ireo sokajy 6 niadiana. Anisan’izany ny ni­batan-dRazafimandimby To­kini­rina ny amboara, teo amin’ny «serie A», sokajy lehilahy. Niavaka ihany koa ny fandresen-dRazakasoavina Lalama­hefa, teo amin’ny «serie B», lehilahy ihany. I Soaniaina Tombotsoako kosa no voahosotra ho tompondaka teo amin’ny «serie A» vehivavy. Ho an’ny sokajy zandriny latsaky ny 17 taona zazalahy, voalohany Razakasoavina Irina.
Ny hany tsy azon’ny MB2 All, dia ny teo amin’ny “série C” senior, sokajy lehilahy, lasan’Andrianantenaina An­tho­nio, mpilalaon’ny LCSMI izany. Toy izany koa ny teo amin’ny «série B» senior vehivavy, norombahin-dRasolo­maromihaja Tahirivola, avy amin’ny klioba DDBC. Antony nikarakarana izao fihaonana izao, ny tsy fahampian’ny fifaninanana eo amin’ireo mpilalao, raha ny nambaran’ny Dr Rakotomalala Jean Claude. Tsiahivina fa nisahana ny fikarakarana rehetra ireo mpilalao beazina ao anaty klioba ihany. 50 ny isan’ireo mpilalao nifaninanana tamin’ity ka avy amin’ny klioba 7 eto Analamanga avokoa izy ireo.

Torcelin

Tsy niakatra “podium”, ny solontena malagasy, Randafiarison Rosina, nandritra ny fiadiana ny tompondaka maneran-tany, taranja fibatana fonjamby, atao any Thaïlande. Laharana faha-16 izy rehefa nahavita nibata 172 kilao teo amin’ny “Total Olympique” (77kg arraché, 95kg épaulé jeté).
Tontosa, ny talata 2 avrily lasa teo ny fiofanana “Young Coach”, tany Taolagnaro, ligim-paritra Basikety Anôsy, izay nanomboka ny alakamisy 28 marsa teo. Mpiofana 15 mianadahy, ka vehivavy ny 4 tamin’izy ireo, no tonga niatrika ity fiofanana ity ka nahazo ny mari-pankasitrahana.
Notanterahina ny faran’ny herinandro teo, teny Ivato, ny fiadiana ny tompondakan’Analamanga, taranja Bodybulding. Mpikatroka maherin’ny 40 no nandray anjara nandritra izany, nahitana ny sokajy “miss bikini”, “men’s Physique”, “classic physique” ary ny “Bodybulding”.
Hatao ny 27 sy 28 avrily izao, ao amin’ny kianja mitafo Ankoay Ankorondrano, ny “Grand Open de Mada”, taranja Jiu-jitsu Breziliana, Gi sy No Gi. Ahitana sokajy telo izany dia ny ankizy, ny lehibe ary ny Master, mandritra ity fifaninanana ity. Misokatra ny fisoratana anarana.

Raha tsy misy ny fiovana, hanomboka ny alahady 7 avrily ho avy izao, etsy amin’ny kianja Makis Andohatapenaka ny fifaninanam-pirenena ho an’ny rugby sokajy D1 vehivavy. Lalao ho an’olona 15 io ho tanterahina io. Araka izany, takin’ny Malagasy Rugby ny hanavaozan’ny mpilalao rehetra handray anjara amin’izany ny kara-pilalaovany. Tafiditra ao anatin’ny fanomanana ny fiadiana ny ho tompondakan’i Afrika (Can 2024), hatao eto Madagasikara, ny volana mey ho avy izao, izany.
Marihina fa tafiditra ao anatin’ny tetikasan’ny Rugby Afrique ny fanomezana lanja ny fifaninanana ho an’ny vehivavy, indrindra ny rugby à XV. Tsiahivina fa anisan’ireo efa manana ny toerany eto Afrika, ny Makis Ladies na eo amin’ny rugby lalaovina olona 7 izay vao avy nandrombaka ny medaly volafotsy nandritra ny lalao afrikanina tatsy Ghana, ny volana marsa lasa teo, na eo amin’ny rugby ho an’olona 15.
Firenena efatra no hiady izay ho lohany amin’ny Can 2024, ny Makis Ladies mpampiantrano, ny Springboks Afrika Atsimo, i Kenya ary ny Liona-n’i Cameroun.

Tompondaka

Malagasy mpilomano tsy zovina amin’ny maro, Rabejaona Holy Antsa. Nisongadina tanteraka izy, nandritra ny fiadiana ny tompondakan’i Madagasikara, taranja lomano, 25 metatra, natao farany teo.

Fahombiazana tanteraka no azon-dRabejaona Ho­ly Antsa, nandritra ity fifaninanana natao teny amin’ny dobo filomanosana Anta­nimena ity, ny faran’ny herinandro. Fandresena 100 isan-jato no azony satria, naharesy hatrany izy tamin’ireo fifaninanana enina natrehany. Medaly volamena 6 be izao, araka izany, no niambozonany teo amin’ny fifaninanana ho an’olon-tokana miisa enina izay nandraisany anjara. Tsy izay ihany, fa mbola norombahan’ny klioba misy azy, Managing Sporting Swimming ihany koa ny anaram-boninahitra, teo amin’ny “relais”.

Nahazo “records nationaux” 3
Ankoatra ireo medaly 8 azony ireo, nahavita nanatsara ny zava-bita tsara indrindra nasionaly 3 be izao ihany koa i Holy Antsa, tamin’ny fifaninanana nataony. Nambarany fa afapo izy tamin’ny vokatra azony. Hita taratra ny ezaka natao ary indrindra ny fiofanana iraisam-pirenena sy ny fifaninanana lehibe natrehany tany ivelany, izay nahafahana nampiakatra ny fahaiza-manaony. “Mahafinaritra foa­na ny milomano eto an-tanindrazana, ny mizara ny zavatra tiana sy mifanampy ary indrindra ny miaina fahafinaretana mandritra ny fifaninanana izay atao eto Madagasikara”, hoy ny nambarany taorian’ny fandraisany anjara tamin’iny fiadiana ny tompondakan’i Ma­da­­gasikara iny. Tsiahivina, tontosa ny faran’ny herinandro teo, teny amin’ny dobo filomanosana teny Antanimena, ny fiadiana ny tompondakan’i Madagasikara taranja lomano, ho an’ny dobo filomanosana 25 metatra. Zava-bita tsara indrindra 7 no montsana nandritra izany, araka ny vokatra.

Mi.Raz

Nampita ny hafatra Paka ny eo anivon’ny FJKM, amin’ny alalan’ny filohany, ny Dr Andriamahazosoa Irako Ammi. Notsiahiviny tamin’izany ny tantaran’i Jesoa, namela ny fitiavana vonon-kiady tsy hamela antsika ho faty fa naleony izy no maty, araka ny nambarany. “Fitiavana nandresy ny fahafatesana izany. Velona ny fanantenantsika… Tsy ho tompon’ny teny farany ny ratsy”, hoy izy. Nanteriny fa herinandro nahamenatra iny lasa iny satria novonoina ilay lehihaly nanasoa sy namoky hazandrano dimy sy mofo roa ary nanasitrana ny marary… Mora norebirebena sy azo fahanan-dalitra ary tsy mahalala ny hahafaty azy ireo vahoaka tamin’izany, araka ny nambarany. Teo koa ilay mpi­tsara, i Pilato, tsy nanafina ny fahalovana sy maty eritreritra ary kanosa tsy sahy nijoro amin’ny fahamarinana. “Nanasa tanana nefa nihoson-dra”, hoy izy. Note­ba­hiny koa ny fahambanian-tsain’ireo miaramila Roma­nina, nanaiky ny baiko tsy ara-drariny sy ny tombontsoa kely azo tamin’ny fizarana fitafiana. Nandrora sy nanao herisetra ary azo novidiana vola ka nanafina ny marina amin’ny nitsanganan’i Jesoa ho velona. Na izany aza, nambarany fa tsy adinon’ Andriamanitra isika na eto amin’ny tany feno fanamparam-pahefana anjakan’ny fahalovana sy ny tsy fahamarinana aza. Nandresy ny ratsy ka nandihy. “Hisy farany anefa ny zava-drehetra ary mbola hiposaka ny fandresen’ny fahamarinana”, hoy izy.

Synèse R.

Nanao tohivakana ny fanambarana. Nampahery ny filohan’ny Antenimi­erampirenena teo aloha, Razanamahasoa Christine, ny fikambanan’ny zanaky ny faritanin’i Fianarantsoa, araka ny fanambaran’izy ireo, ny herinandro teo.

“Tokony hahay haka lesona isika… Jereo ny tranga niseho tany Senegal… Afa-baraka eo anatrehan’ny sehatra iraisam-pirenena isika… “, hoy ny mpitondrateny, i Jean Baptiste. No­hitsin’izy ireo fa mikorontana tanteraka ny zotran’ny fiainam-pirenena ary miha ma­hantra ny vahoaka. Manja­vozavo ny hoavin’ny taranaka, araka ny fa­nambarana hatrany. Tampe­nam-bava sy anaovana ramatahora ny milaza ny marina. “Tsy misy intsony ny fahafahana maneho hevitra ary manjaka ny didy jadona sy ny fisamborana”, hoy ihany izy ireo. Noraisi­ny ho ohatra izao mihatra amin-dRazanamaha­soa Christine izao, rehefa notorin’ny IRD teny amin’ny HCC.
Tsy mifanalavitra amin’izany koa ny fanambaran’ireo olobe sy tangalamena ary fikambanana ao Ambatofinan­dra­hana. Mitsipaka marindrano ny didin’ny HCC izy ireo. “Raisi­nay ho fanaovana tsinontsinona sy fanitsakitsahana ny zo aman-kasin’ny va­hoakan’ Ambatofinandrahana izany. Solombavamba­hoakan’i Mada­ga­sikara izy ary voafidy teto”, hoy ihany izy ireo.
Tsiahivina fa efa nesorana, ny herinandro teo, ireo mpitandro filaminana niambina ity lehibena andrimpanjakana teo aloha ity.

Synèse R.

Milanja 2,5 taonina ny lavanila naondran’ny tantsaha avy ao amin’ny faritra Analanjirofo sy Atsinanana nankany Alemaina, ny herinandro lasa teo. Fanondranana voalohany nataon’izy ireo, ao anatin’ity lalam-pihariana ity, izany. Nalefa fiaramanidina niainga teny amin’ny seranam-piaramanidina iraisam-pirenena Ivato ny vokatra.
Mitentina 3 087,4 miliara Ar ny totalin’ny fanafaran’entana nataon’i Madagasikara nandritra ny roa volana voalohan’ny taona. Nihena 630 miliara Ar izany raha oharina tamin’ny roa volana voalohany tamin’ny taon-dasa. Mitentina 3 717, 4 miliara Ar ny vola nivoaka tamin’izay, raha mitotaly 21 229,7 miliara Ar izany nandritra ny taona 2023.
Laharana faha-97 amin’ny firenena 176 maneran-tany i Madagasikara amin’ny resaka fahafahana ara-toekarena. Nihemotra toerana 6 ny isika Malagasy raha oharina tamin’ny taon-dasa, faha-91 isika tamin’izany. Mitana ny laharana faha-11 amin’ny firenena 47 kosa ny Nosintsika aty Afrika atsimon’i Sahara.
Ahina hitombo ireo karazana hazandrano manimba ny tontolo iainana an-dranomasina ho tafiditra eny amin’ny seranan-tsambo noho ny fanjonoana tafahoatra sy ny fiakaran’ny hafanan’ny tany. Ahina ho feno azy ny seranan-tsambo amina firenena maro ka anisan’izany i Madagasikara noho ny firoboroboan’ny fifandraisana an-dranomasina.

Nisokatra nanomboka ny herinandro teo, eny amin’ny Mining Business Center Ivato, ny «Guichet unique d’exportation». Dingana goavana hanamorana ny fikirakirana ireo antontan-taratasy ilaina amin’ ny fanondranana ny harena an-kibon’ny tany, toy ny volamena, metaly sarobidy ary vatosoa avy eto Madagasi­kara izany. Mivondrona amina toerana iray avokoa, araka izany, ireo sampandraharaham-panjakana samihafa voakasika amin’ny fikirakirana ny antontan-taratasy. Masoivohon’ny tahirimbolam-panjakana amin’ izany ny Bureau des cadastres miniers de Madagascar (BCMM) sy ireo mpiara-miasa aminy eny amin’ny Trésorerie principale Analamahitsy– TPA /DCP misahana mivantana ny minisiteran’ny Harena an-kibon’ny tany sy ny loharanon-karena stratejika sy ny «Service des Finances Extérieures – FINEX/DOF.
Tanjon’ny fitondram-panjakana ny hanamafisana ny fiarovana sy ny fanaraha-maso ireo vokatra azo avy amin’ny harena an-kibon’ny tany natao haondrana. Eo ihany koa ny fanatsarana ny fitantanana amin’ny fomba mahomby sy mangarahara. Mikendry ny hampiroborobo ny tontolon’ny fampiasam-bolan’ireo Mala­ga­sy mpandraharaha misehatra amin’ny harena an-kibon’ny tany ny fametrahana ity «Guichet unique d’exportation» ity.

Henintsoa H.

Niverina nisokatra nanomboka ny 1 avrily teo ny fotoam-panjonoana sy fitaterana ary fivarotana orantsimba (langouste) ao amin’ny faritra Anôsy, raha niato nandritra ny telo volana, nanomboka ny 1 janoary. Mahatratra hatrany amin’ny 449,4 kg ny vokatra tonga nandritra ny fanangonana ny antontanisa voaray eny anivon’ireo mpanangom-bokatra. Ankoatra izay, nilaza ny minisiteran’ny Jono sy ny toekarena manga fa miisa 11 ny fahazoan-dalana hanangona ity vokatra ity ao an-toerana. Araka izany, nisy ny fidinana ifotony nataon’ny fitantanam-paritry ny Jono sy ny toekarena manga ao amin’ny faritra Anôsy, nijerena sy nanaraha-maso ny fisokafan’ny fotoam-panjonoana. Fotoana izay nahafahana ihany koa nanangonana ireo antontanisa voalaza etsy ambony. Nampahatsiahivina ireo mpisehatra amin’ity lalam-pihariana ity ihany koa ny lalàna mifehy ny jono sy ny fanangonam-bokatra eto amintsika. Voalaza tamin’izany fa orantsimba mirefy 20cm ny ambany indrindra no azo trandrahina sy hamidy. Voarara kosa ny fitrandrahana ireo orantsimba mitondra atody. Ao anatin’izay, ilaina ny fahazoan-dalana (permis)
amin’ny fanangonam-bokatra. Ilana izany ihany koa ny fanondranana mankany ivelany (autorisation d’exportation)

Henintsoa H.

Tontosa ny faran’ny herinandro teo, teny amin’ny kianja mitafon’Ankorondrano, ny fiadiana ny tompondakan’i Madagasikara, taranja Jiu-jitsu Breziliana, “Nach No Gi”. Klioba mendrika indrindra ny Checkmat, nahazo medaly volamena 15, volafotsy 8 ary alimo 8. Ankoatra ny klioba mendrika, nisy koa ny teknisianina mendrika nomena loka, ka nahazo izany, teo amin’ny sokajy vehivavy, i Nofy avy amin’ny Checkmat. Azon’i Fifaliana avy amin’ny One tribe kosa ny teo amin’ny lehilahy ary i Majuel avy amin’ny Checkmat no nandrombaka izany teo amin’ny ankizy. Tsiahivina, 167 ny mpikatroka nisoratra anarana tamin’ity fifaninanana ity. 152 kosa no tonga nilanja sy nanao ny Contre pesée. Klioba 11 nandray anjara, ady tsotra 134 no nitranga ary ady “absolute” 5. Nisongadina tanteraka i Nofy satria mbola izy hatrany no nahazo ny fandresena tamin’ny “combat absolute”, vehivavy, raha toa ka norombahin’i Andy izany teo amin’ny lehilahy. Voafidy nahazo ny “fair play” kosa i Laiea. Nahafa-po ny fifaninanana nasionaly, amin’ny ankapobeny, araka ny nambaran’ny teo anivon’ny federasiona malagasin’ny Jiu-jitsu Breziliana. Mbola maro ny fandaharam-potoana miandry ny federasiona. Anisan’ny goavana amin’izany ny fandraisana ilay tompondaka maneran-tany, i Royce Gracie, ny 26 mey ho avy izao. Ny Telozoro Events no mikarakara ity fiofanana goavana ity eto an-toerana amin’izao fotoana izao manomana izany. Tsy nanadino nisaotra ny fanjakana amin’ny alalan’ny minisiteran’ny Tanora sy ny fanatanjahantena sy ireo mpanohana maro ny federasiona malagasin’ny Jiu-jitsu Breziliana.

Mi.Raz

Notanterahina teny amin ‘ny kianja Makis Andohatapenaka, ny zoma lasa teo, ny fitsapana an-tsoratra sy ara-batana ho an’ireo mpitsara miisa 35 mianadahy. Natao Hanatsarana ny kalitao eo amin’ny lafin’ny fitsarana mandritra ny fifaninanana « XXL Top 12 » izany. Tsiahivina fa ny fifanintsanana dia hitohy amin’ny 7 avrily ho avy izao.

Hotontosaina ny alahady ho avy izao, eny amin’ny SRK Karting Imerintsiatosika, ny fifaninanana Moto scooter Slalom, dingana faharoa. Tsiahivina fa ny klioban’ny Scoot Racing Club( SRC ) no mikarakara ny fifanintsanana hiadiana ny ho tompondakan’i Madagasikara.

Nifarana teo amin’ny dingan’ny savaranonando faharoan’ny fiadiana ny amboaran’i Madagasikara “Telma Coupe 2024”, taranja baolina kitra, ny dian’ny klioba Jet Kintana. Lavon’ny Requin Bleu tamin’ny isa 4 no ho 2 ity ekipa avy any Itasy ity ny zoma 29 marsa teo, teny Ambohidratrimo.

Tontosa afakomaly, tao amin’ny Kianja Velodromes Marseille, ny fihaonan’ny Paris Saint Germain sy ny Olympique de Marseille, fihaonana tafiditra amin’ ny fiadiana ny ho tompondakan’i Frantsa, taranja baolina kitra. Lavon’ny PSG 2 no ho 0 ny OM tamin’ity fifanandrinana ity.

Notontosaina teto Antananarivo, nanomboka ny 24 marsa hatramin’ny afakomaly ny fiadiana ny tompondakan’i Afrika, “leg 1 sy 2”, taranja tenisy, sokajy zandriny U14, lahy sy vavy. Nandrombaka ny medaly volafotsy teo amin’ny lalaon’olon-droa miaraka, vehivavy, Andriamaniraka Ainatia sy ilay zimbaboey, Chapepa Kuzivaishi.
Nahazo ny alimo, tamin’ny lalao ho an’olon-tokana, lehilahy, kosa Razafindrazaka Ny Avo.
Tsara ny mampahafantatra fa miisa 30 mianadahy, 16 lahy sy 14 vavy, ireo mpilalao tenisy manerana an’i Afrika nifaninana tamin’ity. Ankoatra izay, ny 15 – 20 avrily ho avy izao, any Algerie, hiatrika ny fifanintsanana Afrikanina, sokajy zandriny U16 indray isika Malagasy.
Raha tsy misy ny fiovana amin’ny fandaharam-potoan’ny federasiona malagasin’ny taranja tenisy (FMT), hisy fifaninanana nasionaly “Open Regional FMT”, amin’ity volana ity. Tsy mbola voafaritra ny toerana sy ny fotoana hanatanterahina izany.

Fitia Randria

Nahavita dingana goavana ny Magic, mpikarakara ny “Motor show 2024”. Fampirantiana ireo fiara tranainy sy hiaka farany eto Madagasikara. An’aliny ireo mpitsidika tonga tetsy Mahamasina, ny faran’ny herinandro teo.

Fahombiazana ny andiany voalohany amin’ny “Motor show 2024”. He­tsika nampirantiana ireo fiara sy kodiaran-droa tetsy amin’ny kianja Barea Mahamasina, ny sabotsy 30 sy ny alahady 31 marsa lasa teo. Tratra ny tanjona raha ny nambaran-dRa­naivo Tojo, anisan’ireo mpikarakara avy ao amin’ny Magic. Nahatratra iray alina ireo mpitsidika tonga tao an-toerana nandritra ny seho, nahitana ankizy hatramin’ny olon-dehibe 80 taona, miandahy miambavy. Na goavana aza ny zavatra natao, tsy sarotra ny nanatontosa azy satria nifanohana sy niray hina ny rehetra.
Nomarihiny fa nisy ny olona nisoloky nilaza fa tompon’ny hetsika saingy tsy nanamaloka ny fizotry ny hetsika izany. Tsiahivina fa nanangonana vola hanampiana hitsaboana ireo ankizy marary eny amin’ny hopitaly ny “Motor show 2024”.
140 ny fiara, 30 ny moto ary 100 ireo fiarakely, “miniatures”, naranty ka teo ireo efa tranainy raha nisy koa ny hiaka farany, amin’ny marika samihafa toa ny Mustang, ny Porsche, ny Mercedes, ny Peugeot sy ny hafa. Anisan’ny nahasarika ny mpitsidika maro ny nijery sy nahalala ny amin’ ny fiara Lamborghini.
Hopitaly telo no hisitraka ny vola azo tamin’ity hetsika ity, ny ao amin’ny HJRA, ny eny Ambohimiandra ary ny hopitalin’ny zaza eny Tsa­ra­lalana. Mba hialana amin’ny ahiahy sy ny hisian’ny fangaraharana, hampahafantarina ny mpanao gazety ny vola rehetra azo mialoha ny hizarana izany amin’ity herinandro ity. Nampanantena i Tojo fa hisy ny andiany faharoa ary hisokatra bebe kokoa hatrany amin’ny faritra. “Tsy hireharehana ny kely vita fa hanohanana ny mpiara-belona”, hoy izy.

Torcelin

Efa manana ny toerany ny gadona Reggea, raha ny eto Madagasikara, hoy ny tomponandraikitry ny “Fianara Reggea Festival”, hetsika natokana hanandratana ity gadona ity eto amintsika. Notanterahina tany Fianarantsoa, ny 29 hatramin’ny 30 marsa 2024, ity hetsika ity, raha tsiahivina. Maro ny mpankafy niatrika ary samy afapo ny rehetra.

Hipoka tanteraka Antsahamanitra, omaly, nandritra ny fampisehoana niarahana tamin’ny tarika Rebika. Anisan’ny nampihetsi-po ny maro ny nahita an-dRampal, mbola niaka-tsehatra ihany, na dia mbola tsy ao anatin’ny fahasalamana aza. Tsy miova fa mbola manana ny toerany hatrany ny tarika, ary tsikaritra ny fitomboan’ny tanora mankafy azy ireo.

Tontosa ny faran’ny herinandro teo, teny amin’ny La City Ivandry, ny lanonana namoahana tamin’ny fomba ofisialy ny vokatra miisa roa, ao anatin’ny edisiona Teny, an’ny Trano fivarotam-boky “La Canopée”. Mitohy hatrany ny ezaka amin’ny fitaomana ny olona ho tia boky, ho an’ny fanabeazana sy ho tombontsoan’ny besinimaro.

Tanterahina, eny amin’ny AFT Andavamam­ba, hatramin’ny 13 Avrily 2024, ny “Exposition d’art”. Fampirantiana hanehoana ny zavakanto sy ny fahaizan’ireo mpiofana tao anatin’ny tetikasa “Kanto manabe”. Tanjon’ny hetsika ny hampiroboroboana sy hampiakarana ny fahaiza-manaon’ireo mpiofana ao anatin’ny tetikasa “Kanto manabe”.

Cette femme revend des céréales ainsi que des grains ramassés dans les marchés traditionnels, à des coûts moindres. C’est un business assez particulier. Suivez cet épisode de Focus avec NewsMada.

Nifarana omaly, teny amin’ny kianja mitafon’Ankorondrano, ny fiadiana ny tompondakan’i Madagasikara, taranja judo, sokajy minimes, cadets, juniors ary seniors.

Niakatra ny lentan’ny fifaninanana ary hita ho miakatra ihany koa ny haavo teknikan’ireo klioba vao misandratra. Na izany aza, tsy mbola mety lefy laza ny klioban’ny Saint Michel Amparibe sy ny ESCA Antanimena. Saika nifampizaran’ireto klioba ireto ny medaly volamena, nandritra ity fifaninanana nasionaly ity. Ady anisan’ny nisongadina ny fifanandrinana teo amin’ny sokajy latsaky ny 66kg, ka nahazoan-dRasoa­naivo Razafy Luc, avy amin’ny klioban’ny Saint Michel am­boara. Nanamarika ity fifaninanana nasionaly ity ny fanomezana grady ka nahazo izany, Andriamiharivolamena Zavamanitra, 1er dan, Rabe­miarana Ramanetaka Maha­toky, 2è dan, Rakotonindrina Olivier Pascal , 2è dan, Raso­loson Andriniaina Randy, 3è dan ary Rasamoelina Joha­rinavalona , 3è dan. Ankoatra izay, nisy ny fanomezana voninahitra ny maître Heri­niaina Vestalys, nahazo me­daly alimo, nandritra ny fiadiana ny tompondaka maneran-tany, sokajy Vétérans. Nam­baran’ny filohan’ny federasiona malagasin’ny judo, fa nampiseho ny fahaizany izay mbola tsy nisy teo amin’ny tantaran’ny Judo malagasy, ny Maître Heriniaina Vestalys. Noho izany fitondrana avo ny voninahi-pirenena sy ny lazan’ny judo malagasy izany, nomena ny grady 4è Dan izy. Fandaharam-potoana nanamarika ity fiadiana ny tompondakan’i Madagasikara ity ihany koa, ny seminera ho an’ny CTR (Conseils téchniques régionaux) sy ny filohana ligy ary ny mpikambana eo anivon’ny federasiona ma­lagasin’ny Judo. Nampaha­tsiahivina nandritra izany ny anjara andraikitra ny CTR, ny fomba fisafidianana mpikatroka ary ny fomba fiasa sy fandrindrana ny asan’ny ligy sy ny federasiona.

Mi.Raz

Hotontosaina any Antalaha sy Sambava, ny 13 hatramin’ny 19 mey ho avy izao, ny fifaninanana baolina kitra eny amin’ny torapasika, «Beach Soccer». Miisa 10 ireo ligy mandray anjara amin’izany. Tsara marihina fa hatao ny volana jolay, any Manakara, ny fiadiana izay ho tompondakan’i Madagasikara.

Notontosaina nanomboka ny 26 marsa lasa teo, teto Antananarivo, ny fifaninanana Afrikanina ho an’ny taranja tenisy, sokajy zandriny U14, lahy sy vavy. Miisa dimy ireo Malagasy niatrika ny lalao ampahefa-dalana, omaly. Anisan’izany ry Chrystella, Ainatia, Matei sy i Christophe ary Ny Avo.

Hisokatra amin’ny 7 avrily ho avy izao, eny amin’ny kianja Makis Andohatapenaka, ny fiadiana ny ho tompondakan’i Madagasikara, taranja Rugby, sokajy vehivavy. Manao fanentanana ho an’ireo klioba ny eo anivon’ny Malagasy Rugby, mba hanavao ny kara-pilalaovana amin’ity taom-pilalaovana ity.

Afaka andro vitsy, hiditra amin’ny lalao ampahefa-dalan’ny fiadiana ny ho tompondakan’i Eoropa, “Ligue des Champions 2024”, indray ny mpakafy baolina kitra maneran-tany. Anisan’ireo lalao tena andrasan’ny maro amin’izany, ny fihaonana eo amin’ny Manchester City Anglisy sy ny Real Madrid Espaniola. Fihaonana izay hatao ao Santiago Bernabeu Espagne, ny 9 avrily ho avy izao.

Miisa 21 309 ireo mpandeha tamin’ny sambo lehibe mpitondra mpizahantany tonga tao Antsiranana hatramin’ny nanombohan’ny «saison des croisières». Manodidina ny 10 ihany koa ireo sambo vaventy nigadona teny amin’ny seranan-tsambon’Antsiranana sy ny Nosy Hara nanomboka ny volana novambra 2023.

Mampitombo 47 % ny taham-panondranana mankany amin’ny tsena Afrikanina ny fanatanterahana ny Zlecaf. Mampivelatra ny tsenam-barotra, mampitombo ny karazan-bokatra haondrana, mampisy fifaninanana eo amin’ny rojom-pihariana ary mampivoatra ny fandraharahana eto Madagasikara ny faritra malalaka ara-barotry ny kaontinanta Afrikanina.

Mitohy ny fampidirana ny fitaovana andiany faha-2 hatramin’ny faha-8, ilaina amin’ny foibe famokarana herinaratra azo avy amin’ny masoandro, manana tanjaka 50 MW. Horaisin’ny fanjakana an-tanana ny fandoavana ny hetra sy ny haban-tseranana amin’ny fanafarana azy ireo avy any ivelany.

Mitentina 1 miliara Ar ny vola hatokana ho an’ny zotra an-dalamby FCE, Fianarantsoa-Manakara, avy amin’ny minisiteran’ny Fitaterana. Handoavana ny karaman’ny mpiasa, ny latsakemboka Cnaps, hampiodinana ny FCE, hanamafisana sy hiarovana ny fitaovana an-dalamby io vola io.

Hotanterahina eny amin’ny Avenue de la Gare Antsirabe, manomboka ny 5 hatramin’ny 7 avrily ho avy izao, ny fiadiana ny amboaran’i Madaga­sikara, taranja tsipy kanetibe. Hotolorana lelavola 2 tapitrisa Ar izay mahazo ny laharana voalohany amin’ny sokajy “séniors”, lehilahy, lalaon’olona telo. Araka ny vaovao nampitan’ny Federasiona malagasin’ny tsipy kanetibe (FSBM), omena 750 000 Ar izay mahazo ny laharana faharoa ary 5 hetsy Ar avy ny an’ireo ekipa fahatelo sy fahefatra amin’izany.
Ankoatra izay, hisy ihany koa ny fifanintsanana ho an’ireo sokajy hafa, toa ny vehivavy “seniors”, zandriny “juniors”, zokiny “vétérans”. Tsara ny mampahatsiahy fa hifarana rahampitso ny fe-potoana nomena ireo klioba sy mpilalao amin’ny fanavoazana ny kara-pilalaovana amin’ity taona 2024 ity. Izay manana kara-pilalaovana ihany no afaka mandray anjara amin’ity fiadiana ny amboaran’i Madagasikara 2024 ity.
Raha esorin’ny Fede­rasiona iraisam-pirenen’ny taranja tsipy kanetibe ny sa­zin’i Madagasikara, dia izay mandresy amin’ity no solontenan’i Madagasikara mandritra ny fifaninanana Afrikanina, sokajy lahy sy vavy, any Maroc, ny volana jona ho avy izao.

Fitia Randria