Tsy mitovy fomba fijery amin’ny Federasionina malagasin’ny tsipy kanetibe (FSBM) ireo mpitantana klioba ato anatin’ny ligim-paritra Analamanga. Tsy manaiky ny lalàm-pifidianana manome vahana ny FSBM izy ireo ka mitaky ny hanovana izany, hisian’ny fifidianana madio sy mangarahara.

Namory ny mpanao ga­zety tetsy Antani­na­re­nina, omaly, ireo filohana klioba amin’ny tsipy kanetibe miisa 20 ato anatin’ny ligim-paritra Analamanga. Nanam­bara ny tsy fetezan’ny lalàm-pifidianana hatao ny volana desambra ho avy izao izy ireo. Niakatra ny feo ary tsy nitsitsi­tsitsy fitenenana mihitsy izay nitondra teny tamin’izany. Na­motsipotsitra ny tsy nety izy ireo.
Nambaran-dRatsimbaha­rison Luc, mpitantana ny klioba UBM Ambohitrimanjaka, fa nataon’ny mpitantana ny federasionina ankehitriny amin’ izay maha mety azy ny lalam-pifidianana, tsy mifanaraka amin’ny lalàna misy. Saka­nana amin’ny fomba rehetra ny mpifanandrina ary ahilika ny olona heverina fa afaka hi­faninana amin’ny filoha ankehitriny. Ankoatra izay, ny fametrahana olona ao anatin’ny mpanara-maso ny fifidianana, izay olona ao anaty FSBM ihany. Noho izany, takin’izy ireo ny hanoloana azy ary ha­naovana fivoriambe iarahana mamolavola ny lalàm-pifidianana. Nohamafisin’ny filoha Ramirez fa handefa taratasy fampahafantarana any amin’ ny minisiteran’ny Fanatan­ja­hantena sy ny komity olym­pika malagasy (Com) ireto filohana klioba 20 ireto. Miantso ihany koa ireo mpitantana ekipa any amin’ny faritra ma­nerana ny Nosy izy ireo hanatevin-daharana. Miandry ny valin-tenin’ireo tomponandraikitra izy ireo mialoha ny hidi­rana amin’ny dingana hafa raha toa ka miziriziry amin’ny heviny ny FSBM. Marihina fa manaiky ny daty hanaovana ny fifidianana izy ireo, ny 6 desambra ho an’ny ligy ary 27 desambra ny an’ny federasionina.
Tsy nanafina koa ny tenany tamin’ny fampanantenana poakaty nataon’ny filohan’ny Federasionina ny amin’ireo ekipa mahazo ny ho tompondaka sy ny amboaran’i Madagasikara.

Tompondaka

Miroborobo ny vokatra lavanila sy jirofo eto Madagasikara, saingy mitontongana ny vidiny ankehitriny, noho ny fidinan’ny lanjan’ireo vokatra ireo eto amintsika. Mbola tsy nisy toy izao teto Madagasikara, hoy ny mpandraharaha amin’ny vo­katra lavanila sy jirofo nanaovana fanadihadiana. Tsara tokoa ny vokatra tamin’ity taona ity, saingy ny vidiny no nihena. Tsy avy amin’ny fitondrana izany, hoy hatrany izy, fa noho ny fihenan’ny sandam-bola sy ny toekarena ankapobeny mihitsy. Araka ny fanazavany, ny vokatra lavanila sy jirofo dia manana tsingerina amin’ny fiakaran’ny vidiny. Mbola antenaina hiverina hiakatra ao anatin’ny taona vitsivitsy izany. Nohamafi­sin’ity mpandraharaha ity fa misy ihany koa ny antony avy amin’ny Malagasy tantsaha manampy amin’ny fihenan’ny vidiny. Anisan’izany ny fanaovana fantsika na vatokely anatina lavanila, ny fitangosana lavanila mbola tsy matoy ka tsy ampy “taux de vanilline” rehefa tonga any ivelany. Amin’ny firenena hafa anefa, hoy izy, dia voakarakara tsara ny vokatra ka tsy misy fisolokiana. « Ho an’ny jirofo indray, mbola misy tsy matoy tanteraka, tsy maina tsara, ary indraindray mbola mando alohan’ny fandanjana, ka mahatonga azy ho simba rehefa tonga any ivelany », hoy Ran­drianatoandro Ferdinand, mpandraharaha amin’ireo sehatra roa ireo.

Fihariana vaovao  ny toaka gasy
Taorian’ny fanekena ny lalàna mifehy ny toaka gasy teo anivon’ny Antenimieram­pirenena, lasa fihariana vaovao ho an’ny mponina ao amin’ny distrikan’i Toamasina II ny fanaovana toaka gasy. Ho an’ireo tsy manana fitaovana manokana na “lambiky”, mivarotra ny akora ilaina amin’izany amin’ireo efa mpanodina. Anisan’ny akora ampiasaina amin’izany ny fary, mangahazo, manga masaka, akondro masaka, letisia ary kokombra. Rehefa masaka na voatono ao anaty vilany vy lehibe ireo akora ireo dia afangaro amin’ny hoditra hazo “bilahy”, izay mangidy sady mafaitra, ka manampy amin’ny famadihana azy ho alikaola ao anatin’ny telo andro monja. Vokatry ny fihenan’ny vidin’ny lavanila sy jirofo, maro amin’ny mponina no nanomboka mamboly sy mamokatra ireo akora fototra amin’ny fanaovana toaka gasy ireo, ho vahaolana ha­nampiana ny fidiram-bola sy hanonerana ny fatiantoka amin’ny vokatra fanondrana. Ankoatra izany, mivelatra ihany koa ny fihariana manodidina, toy ny fambolena ireo akora, ny fitaterana amin’ny lakana manaraka ny reniranon’i Ivondro sy Ivoloina, ary ny fanangonana sy fanadiovana ireo zerikanina. Ao amin’ny kaominina Fanandrana, ohatra, dia efa misy trano fanatobiana atao hoe Ravinala, fitahirizana entana sy toeram-piasana manokana amin’izany. Ny zava-pisotro vokarina avy ao dia manana marika “Ravi­nala”, ary araka ny fanadihadiana dia efa nahazo alalana hivarotra izany vokatra izany eny amin’ny mpaninjara. Voa­laza ihany koa fa tsy mihoatra ny 45° ny tahan’ny alikaola ao aminy.

Niandoha tamin’ny covid-19
Araka ny loharanom-baovao avy any an-toerana, efa hatramin’ny fotoanan’ny valanaretina Covid-19 no nisian’ny orinasa madinika Ravinala, izay namokatra alikaola 90° niadiana tamin’ny fiparitahan’ny aretina. Nahomby izany ezaka izany ka rehefa nolanian’ny Antenimierampire­ne­na ny lalàna momba ny toaka gasy dia nanohy ny famokarana tsy misy sakana intsony izy ireo. Ankehitriny, mizara roa ny famokarana ao amin’ny “Ravinala”: ny zava-pisotro azo sotroina sy ny alikaola 90° ampiasaina amin’ny sehatra hafa.

Nanatontosa : Sajo

Nifarana omaly, tany Abi­djan, Côte d’Ivoire, ny fiofanana nampanaovin’ny Fede­ra­sionina iraisam-pirenen’ny bao­lina kitra (Fif a) ho an’ireo Afrikanina mpampiofana mpanazatra. Anisan’ireo nandray anjara tamin’izany ny FMF. Telo mirahalahy niatrika izany. Nahitana an-dRasoa­naivo Rado, tale teknika na­sio­naly. Teo koa Andri­a­ma­m­pilazasoa Fidy Herman sy Andriamahefa Johansson Le­mark, mpampianatra sy mpanabe eo anivon’ny federasionina. Tanjona ny hanondrotana ny lentan’ny baolina kitra aty Afrika.
Ankoatra izay, mikendry ihany koa ny fampifanarahana ny fenitry ny fiofanana manerana ny kaontinanta afrikanina ity natao ity. Eo koa ny fanomezana ireo fitaovana fampiofanana maoderina amin’ity taranja ity. Manantena ny Ka­onfe­derasionina afrikanina (Caf) sy ny Federasionina iraisam-pirenena (Fifa) fa ho lasa mpitatitra mahomby any amin’ny fireneny avy ireo mpampiofana rehetra tany Abidjan, ka hampiely ireo fomba fampianarana vaovao, ho an’ireo mpanazatra ao an-toerana.
Raha ho an’ny Malagasy teknisianina, dingana lehibe amin’ny fanamafisana ny fahaiza-manao teknika ny niatrehin’izy ireo ity fiofanana ity. Tafiditra ao anatin’ny paikady maharitra hahatongavana ho firenena azo itokisana eo amin’ny sehatra afrikanina.

Tompondaka

Hanamarika ny fiadiana ny amboaran’i Madagasikara, sokajy latsaky ny 20 taona, ny fiverenan’ny ekipan’ny Stef’Auto volley-ball avy any Toamasina eo ambony Kianja. Hifaninana eo amin’ny sokajy vehivavy ity ekipa ity, rehefa tsy niatrika izany nandritra ny fotoana ela. Misy ihany ireo klioba vaovao, toy ny HMVB Matsiatra Ambony sy ny GSVB Atsimo Andrefana.

Mitohy hatrany ny fifidianana eny anivon’ny seksionina, taranja basikety, manerana ny Nosy, ao anatin’izao taom-pifidianana izao. Seksionina 9 indray no nahavita izany nanomboka ny faran’ny herinandro teo. Tsiahivina fa tokony hahavita fifidianana ny anivon’ny ligy amin’ity taona ity ary ny volana janoary 2026 no vinavinaina hanatanterahana ny eo anivon’ny federasionina.

Hotanterahina any Luanda, ny 10 hatramin’ny 20 desambra izao, ny lalao afrikanina ho an’ny tanora. Mbola baraingo ny fandraisana anjaran’i Madagasikara, hatreto. Tsy mbola manana vaovao ho lazaina mahakasika izany ireo tomponandraikitra. Tsiahivina, Malagasy atleta 22 no tokony handray anjara amin’ity fifaninanana ity, ahitana ny taranja fibatana fonjamby, baolina kitra, atletisma, basikety, karate ary mety hisy koa ny Judo.

Tontosa ny faran’ny herinandro teo, teny amin’ny Kianja Barea Mahamasina, ny lalao famaranana niadiana ny tompondakan’i Madagasikara, taranja basikety, ho an’ny seksionina Antananarivo Renivohitra. Teo amin’ny sokajy latsaky ny 20 taona, voahosotra ho tompondaka teo amin’ny sokajy lehilahy, ny JCBA Analamanga, rehefa nandresy ny ekipan’ny AKBB tamin’ny isa 53 no ho 34. Teo amin’ny sokajy vehivavy kosa, norombahin’ny ekipan’ny MB2All ny fandresena nanoloana ny ekipan’ny Lucadro, tamin’ny alalan’ny isa 35 no ho 22. Niatrika ny lalao famaranana ihany koa ny teo amin’ny sokajy latsaky 12 taona, lahy sy vavy. Nanao pao-droa ny ekipan’ny MB2All. Isa 25 no ho 13 no nandavoan’ireto farany, sokajy lehilahy ny ekipan’ny Cosfa. 26 no ho 13 kosa no nandresen’ny izy ireo, sokajy vehivavy ny ekipan’ny Fandrefiala, teo amin’izay lalao famarana natao omaly izay.

Mi.Raz

Tsy mitsahatra ny misongadina ny anaran-dRakotondrabe Romuald Felix (Coach Rôrô). Taorian’ny zava-bitany nandritra ny “Chan 2024”, nantsoina hanazatra ny ekipa Young Africans, Tanzanie, izy. Amin’izao indray, voafantina ho anisan’ireo hisafidianana izay ho mpanazatra mendrika indrindra aty Afrika.

Navoakan’ny Kaonfe­de­ra­sionina afrikanina bao­lina kitra (Caf) tamin’ny fomba ofisialy, tao amin’ny tranokalam-pifandraisany, omaly, ny lisitr’ireo teknisianina hisafidianana hahazo ny amboaran’ny mpanazatra me­ndrika indrindra eto Afrika, amin’ity taona 2025 ity na “Coach of the Year – Men 20­25”. Anisan’ireo tafiditra ao ana­tin’izany ny Malagasy mpa­nazatra, Rakotondrabe Romuald Félix (Coach Rôrô). Izy izay nitondra avo ny voninahi-pirenena malagasy nandritra ny “Chan 2024” farany teo.
Tsara ny mampahatsiahy fa anisan’ireo masontsivana, naharesy lahatra ny mpikarakara taminy ny fahombiazany nandritra ny “Chan 2024” ka nahazoany ny laharana faharoa. Tsy tamin’io ihany fa ny taona 2022, nandritra ny Chan natao tany Algerie, tongany teo amin’ny laharana fahatelo ny Barea. Tsiahivina fa efa manazatra ny Young Africans SC, Tanzanie, izy ankehitriny. Mpanazatra efa manana ny lazany avokoa ireo anaty lisitra. Ahitana an’i Mohamed Ouahbi, mpanazatran’i Maroc sokajy zandriny, nandrombaka ny “Mondial U20” farany teo. Ao koa i Tarik Sektioui, teknisianina nitondra ny ekipany hahazo ny “Chan 2024”.

Fitia Randria

Ireto avy ireo mpanazatra tafiditra ao amin’ny lisitra vonjimaika:

Bubista (Cap Vert), Hossam Hassan (Egypte), Krunoslav Jurčić (Pyramids FC Egypte), Sami Trabelsi (Tunisie), Rakotondrabe Romuald Félix (Madagasikara), Moïne Chaâbani (RS Berkane Maroc), Tarik Sektioui (Maroc Chan), Mohamed Ouahbi (Maroc U20), Walid Regragui (Maroc A), Pape Thiaw (Senegal A)

Fahombiazana ny fampiofanana nomena ireo teknisianina avy amin’ny Croix Rouge Malagasy (CRM) momba ny fitondrana drônes sy fakana sary ary fanaovana sarintany amin’ny alalan’ny Sig.

Fiaraha-miasa eo amin’ny BNGRC sy ny CRM no nahafahana nanao fampiofanana. Tanjona ny hanamafisana ny fahaizan’ny ekipa ara-teknika amin’ny fampiasana teknolojia vaovao ho amin’ny fitantanana sy fampihenana ny vokatry ny loza.

Nianatra ny fanatanterahana sidina amin’ny alalan’ny drônes ireo teknisianina. Niofana momba ny fakana sy fanodinana sary avy eny ana habakabaka ary ny famokarana sarintany  amin’ny alalan’ny angon-drakitra jeografika. Nisy mihitsy ny fampiharana nahafahana nandrefy ny fandraisan’ireo teknisianina ny fifehezany ny fiofanana nomena. Mivoatra manaraka ny teknolojia vaovao ny hodidina rehetra hanatsarana ny vokatra na amin’ny fifehezana ny loza na amin’ny fomba fakana sary. Manampy betsaka amin’ny fahazoana vokatra tsara amin’ny asa ny fampiasana ny teknolojia maoderina.

Nizarana mari-pamaranana avy amin’ny mpampiofana izy ireo ho mariky ny fandraisany anjara amin’ny fanamafisana ny fahaiza-manao ara-teknika.

Tatiana A

Raha ny fanampim-baovao voaray farany avy amin’ny mpitantana eo anivon’ny Fe­derasionina malagasin’ny bao­lina kitra, tarihin’Andria­manampisoa Alfred dia efa milamina tanteraka ny fizarana ilay “prize money” ho an’ny delegasionina malagasy, nandray anjara tamin’ny fifaninanana Chan 2024. Samy nahazo ny anjarany na ny FMF, na ny mpilalao. Nitontaly 45 ny isan’ireo nisitraka ny volabe, tambin’ny herim-po nasehon’ny mpilalao. Tsiahivina fa nisitraka 61,8 Tapitrisa Ariary avokoa ny mpilalao tsirairay. Izay nitotaly ho 60 % ny volabe nitentina 1 100 000 dolara, nifampizarana. Marihina fa ny federasionina no nisitraka ny 40 % tamin’izany. Vola izay entina hampiroboroboana ny taranja eto Madagasikara.
Anisan’ny nampimenomenona ny mpilalao sy ny mpisintona lakolosy tao anatin’ny andro vitsivitsy ny fizarana ny vola, andaniny. Ilay fahabangana 100000 dolara tamin’ny totalin’ny vola 1 200 000 dolara, ankilany. Mazava anefa ny fanazavana avy amin’ny tomponandraikitra fa mazava sy mangaraharaha ny fizarana sy ny nakana ilay ampaham-bola. Nisy tamin’ny vola no nentina nanonerana ny saran’ny fifanintsanana tamin’ny taon-dasa, nisy ny lamandy isan-karazany izya efa notapahan’ny Kaonfederasionina afrikanin’ny taranja baolina kitra avy hatrany.

Randria

Nanainga omaly, hihazo an’i Espagne, ny delegasionina malagasy hiatrika ny fifaninanana izay ho tompondaka maneran-tany amin’ny taranja tsipy kanetibe, sokajy zandriny Junior. Fifanintsanana hanomboka ny 23 hatramin’ny 26 oktobra ho avy izao, any an-toerana, izany. Araka ny fikarohana natao, handeha amin’ny Youtube avokoa ny lalao hatrehin’izy ireo.

Tonga nanotrona ny fiofanana “Fiba Africa Regional Youth Camp 2025” natokana ho an’ny sokajy lehilahy, tanterahina any Egypte, ny filohan’ny Federasionina malagasin’ny basikety, Ramaroson Jean Michel. Mpilalao manerana an’i Afrika miisa 40 sy mpanazatra 15 no miatrika ity fiofanana ity. Manana solontena amin’izany i Madagasikara, ahitana an’i Jhod sy i Eymerick.

Ekipa 8 lehilahy sy 7 vehivavy no hifaninana mandritra ny fiadiana ny amboaran’i Madagasikara, taranja volley-ball, sokajy latsaky ny 20 taona hatao eto Antananarivo, ny 25 oktobra hatramin’ny 1 novambra izao. Hifanindry an-dalana amin’izany ihany koa ny fiadiana ny amboaran’i Madagasikara, ho an’ny sokajy “2é division”, ahitana ekipa 12 eo amin’ny sokajy lehilahy ary 8 eo amin’ny vehivavy.

Hisy ny atrikasa eo amin’ny taranja Échecs hotanterahina ny 25 oktobra izao, ao amin’ny Le Louvre Antananarivo, manomboka amin’ny 2 ora hatramin’ny 6 ora hariva. Hisy ny fampianarana, fampirantiana sy fampahafantarana ireo boky mahakasika ity taranja ity izany ka anasan’ny Federasionina malagasy ireo rehetra liana, indrindra ireo vao hanomboka hitrandraka ny taranja .

Tontosa ny faran’ny herinandro teo, tany Maorisy, ny andiany voalohany tamin’ilay fifaninanana “Battle for Africa”, taranja Muay thai. Nandray anjara tamin’izany i Madaga­sikara, tamin’ny alalan’i Jaomboto Jerry Edino, sokajy latsaky ny 60 kg, lehilahy sy Rasoanirina Olga, sokajy latsaky ny 60 kg, vehivavy. Teo amin’ny sokajy lehilahy, nandresy ilay Maorisiana nifanandrina taminy i Jerry rehefa “disqualifié” tamin’ny fihodinana faharoa ny mpifaninana taminy. Nahazo ny tapakila hiatrehina ny andiany faharoa amin’ny “Battle for Africa”, izay mety hatao eto Madagasikara, amin’ny herintaona, araka izany, i Jerry. Tetsy ankilany, resin’ilay teratany Afrikanina Tatsimo, i Verne Prinsloo, ny solontena malagasy Rasoanirina Olga. Tapitra hatreto izany ho azy ny lalana amin’ny fiadiana ilay “ceinture WMC”. Nambaran’ny Maître Razanajatovo Gildas fa nahavita dingana tsara ireto solontena malagasy ireto. Tena niady mafy tamin’ny fiarovana ny voninahi-pirenena izy ireo. Vonona hanarina sy hampitombo ny fahaiza-manaony i Jerry amin’io ady miverina hatao amin’ny taona 2026 io.

Mi.Raz

Hiatrika ny fiadiana ny ho tompondakan’i Afrika amin’ny rugby lalaovin’olona 7 indray ny Makis ladies. Hiady ny tapakila hiatrehana ny World Challenger Series izy ireo. Ekipa magrebianina roa no miray vondrona amin’ny Malagasy dia i Tunisie sy ry zareo Egyptianina.

Raha tsy misy ny fiovana, hotanterahina any Nai­robia, Kenya, ny 15 sy 16 novambra ho avy izao, ny fiadiana ny ho tompondakan’i Afrika, taranja rugby, sokajy vehivavy “Africa Women’s Tournament”. Lalao ho an’olona 7 izy ity. Anisan’ireo handray anjara amin’izany ny Makis Ladies. Ao amin’ny vondrona “D”, miaraka amin’i Tunisie sy i Egypte, no misy azy. Raha ny fihaonana nikatrohan’ny ekipa hatramin’izay, tsy mbola nandresy ny tovovavy malagasy aloha i Tunisie, raha tsy mbola nihaona tamin’ny Makis Ladies kosa ny Faraônan’i Egypte. Heverin’ny rehetra fa tsy hahasakana ny Malagasy ireto ekipa magrebianina ireto, amin’ity.

Tsiahivina fa miisa 12 ireo firenena hiady ho lohany amin’izany. Ao amin’ny vondrona “A”, misy an’i Afrika Atsimo sy i Zimbabwe ary i Maurice. Ny sokajy “B” iarahan’i Kenya sy i Ghana ary i Côte d’Ivoire. Ta­faraka ao amin’ny “C” i Ou­ganda sy i Zambia ary i Bur­kina Faso.
Mifandimby mihaona ny ekipa isam-bondrona ka tafita miatrika ny manasa-dalana izay voalohany manana isa betsaka indrindra. Heverin’ny rehetra fa hiendrika famaranana kely ny fihaonan’i Afrika Atsimo sy i Zimbabwe, izay hiady ny toerana voalohany. Na izany aza, hanana tombony ry zareo Afrikanina Tatsimo izay efa manana traikefa ary efa zatra miatrika ny fiadiana ny ho tompondaka maneran-tany amin’ity rugby lalaovin’olona 7 ity. Tsy hahatohitra ireo ekipa roa ireo ry zareo maorisianina.
Ho an’ny vondrona “B”, raha ny lojika, tsy hahasakana an’i Kenya ireo ekipa miaraka aminy. Toa izany koa ny ao amin’ny “C” izay mety hanjakan-dry zareo ogandey. Tsiahivina fa hanana ny lanjany lehibe ity “Africa Women’s Tournament” ity satria hiadiana ny tapakila hiatrehana ny “World Challenger Series”.

Tompondaka

Nivoaka tamin’ny fahanginany Rabemanantsoa Benja­min, filohan’ny delegasionina Barea, nandritra ny “Chan 2024”, sady komity mpanatanteraka (CE) anivon’ny Fede­rasionina malagasin’ny baolina kitra (FMF). Nohazavainy, omaly, tetsy Isoraka, fa singa telo no nanesoran’ny Kaon­federasiona afrikanina an’ilay vola “prize money” mitentina 1,2 tapitrisa dolara.
Raha ny nambarany, nalain’ny Caf tamin’io vola io, tany am-potony, avokoa ireto zavatra telo ireto: voalohany, ny saran’ny fandefasana ny lalaon’ny Barea nandritra ny fifanintsanana tamin’ny haino aman-jery. Manaraka izany ny resaka lamandy tamin’ny “Chan 2024”, ary farany, ny vidin’ny baolina Puma.
Nomarihin’ity mpikambana anivon’ny CE an’ny FMF ity, fa efa nahazo fankasitrahana sahady tany amin’ny sekretera jeneralin’ny Caf ny fomba fizarana an’io “prize money” io, ary hita ao amin’ny pejin’ny FMF ny porofon’izany. No­tsiahiviny fa efa fantatry ny mpilalao avokoa ilay fomba fizarana: 40 % ho an’ny Federasionina ary ny 60% ho an’ireo Malagasy mpilalao sy ny Staff.

Fitia Randria

Seksionina miisa efatra indray no nahavita ny fanavaozana ny mpitantana azy ho an’ny taranja basikety. Ny seksionina Ambohidratrimo ao anatin’ny ligin’Analamanga, ny seksionina Manakara ao anatin’ny ligy Fitovinany. Miampy ny seksionina Vangaindrano ao amin’ny ligy Atsimo Atsinanana sy ny seksionina Brickaville, ao amin’ny ligy Atsinanana.

Tsy mbola misy fiovana, hatreto, ny fandaharam-potoana amin’ny fiadiana ny amboaran’i Afrika, taranja basikety 3×3, izay hatao eto Madagasikara, ny volana desambra izao, araka ny nambaran’ny filohan’ny Federasionina malagasin’ny basikety, Ramaroson Jean Michel. Mizotra araka ny tokony ho izy ny fanomanana sy ny fikarakarana ary tsy mbola nandefa fampitam-baovao hafa ny eo anivon’ny Fiba Afrika, raha ny fanazavana.

Voahosotra ho tompondaka maneran-tany amin’ny taranja baolina kitra, sokajy U20, i Maroc. Resiny teo amin’ny famaranana, tamin’ny isa mazava 2 no ho 0, i Argentine. Fihaonana notanterahina ny alahady teo, tao amin’ny Kianjan’i Chili. Nampiditra ireo baolina roa ireo i Yassir Zabiri, tamin’ny alalan’ny “coup franc”. Teo amin’ny minitra faha-12 sy ny minitra faha-28 no nahatafidirany izany.

Notanterahina omaly, tetsy Isoraka, ny fizarana ny fanampiana ho an’ireo mpilalao baolina kitra tranainy, nandrafitra ny ekipam-pirenena, nanomboka tany amin’ny Equipe nationale, nandalo tamin’ny Club M sy ny Scorpions ary ny Barea, na ny Anciennes gloires. Nahatratra 44 izy ireo no nisitraka izany avy amin’ny Federasionina malagasin’ny baolina kitra. Nanolotra izany Andriamanampisoa Alfred, filohan’ny FMF. Notsiahivin’i Abdou Bin Amidou fa manana ny fikambanana mijoro ara-dalàna, tamin’ny 21 desambra lasa teo, ary efa nahazo taratasy fankatoavana amin’ny fanjakana, izy ireo. Me Kira Michel no filoha mpitantana azy. Ireo 44 ireo aloha no nisoratra anarana fa mbola ho avy ny an’ireo hafa. Tsiahivina fa mielipatrana manerana an’i Madagasikara ny Anciennes gloires ary efa misy hatrany ampitan-dranomasina. Ankoatra izay, nanambara Andriamihaingo Joel fa manohana ny federasionina izy ireo amin’ny asa fampandrosoana ny baolina ary manohitra ny fanakorontanana. Nilaza kosa Andriama­nampisoa Alfred, filohan’ny FMF, fa hatao isan-taona ny fanohanana ny Anciennes gloires.

Tompondaka

Ho fantatra tsy ho ela ireo minisitra handrafitra ny governemanta. Maneho ny heviny ireo mpisehatra eo amin’ny tontolon’ny fanatanjahantena.

Vital Serge, filohan’ny fikambanana Espoirs sportifs de Tuléar:
“Olona niaina ny fanatanjahantena nanomboka tamin’ny fahazazana, mahalala izany atao hoe fanatanjahantena izany ary manao izany no mendrika ho minisitra hitantana ny minisiteran’ny Tanora sy ny fanatanjahantena eto Madagasikara. Olona mahalala ny rafitra, manana politika sy drafitra ary fahaizana mitantana. Mahafantatra ny fahalalana sy tantaran’ny taranja tsirairay. Afaka hanangana ihany koa ivontoerana isam-paritra. Marihiko fa tsy toerana teknisianina fotsiny ihany ny toerana minisitra fa toerana mpanao politika ihany koa”.

Rabenaivo Alain, filo­han’ny fikambanan’ny mpanao gazety ara-panatanjahantena eto Madagasikara :
“Olona niaina tao anatin’ny fanatanjahantena no tokony ho minisitry ny Fanatan­jahantena, manana ny fahaiza-manao, mahalala tsara ny marary sy ny olana ao anatiny. Manana vinan’asa azo tanterahina anatin’ny fotoana fohy sy lavitr’ezaka. Tsy be resaka sy mampanantena zavatra tsy ho tanteraka. Mahay mifandray sy miara-miasa amin’ny “mouvement sportif”. Mametraka tsara amin’ny toerana ny fiaraha-miasa amin’ny mpanao gazety ara-panatanjahantena. Farany izay goavana indrindra, olona afaka mitady loharanom-bola fa tsy hihanona fotsiny amin’ny tetibolam-panjakana”.

Andriambololona Zo Hajanirina, atleta mpikatroka ny taranja judo:
“Ny minisitra tsara ho an’ny Tanora sy ny fanatanjahantena dia olona akaiky ny atleta sy ny federasionina. Olona mahay mihaino, mahafantatra ny zava-misy eny an-kianja ary mahay mitantana krizy amin’ny fahendrena sy fifandanjana. Manana traikefa sy fianarana mifandraika amin’ny fitantanana ara-panatanjahantena sy amin’ny sehatry ny fitantanam-bahoaka, na amin’ny fikambanana, toy ny federasionina na ny komity Olympika nasionaly. Olona manaja ny marina, mangarahara ary manana vina mazava ho an’ny fampandrosoana ny fanatanjahantena.”

Mi.Raz

Manomboka miakatra ny voankazo. Ny manga sy ny frezy no betsaka eny an-tsena, amin’izao. Mila ampitomboina ny fahadiovana amin’ny fanasana azy ireny mba tsy hiteraka aretina hafa, indrindra amin’ny ankizy, raha ny torohevitry ny dokotera misahana manokana ny ankizy sy ny zaza noresahina.

Sasana madio sy azo antoka, ny voankazo vao hohanina na hahodina ho ranom-boankazo. Mitahiry bibikely sy karazana fanafody afendraka hamonoana bibikely ny frezy ka tena saro-pady ho an’ny fahasalamana. Lomana amin’ny rano madio imbetsaka hialan’ny bibikely sy ny akora simika ateraky ny fanafody biby izay vao tokony hohanina.

Toraka izany koa ny manga, izay tian’ny lalitra ary iparitahan’ny loto maro eny an-tsena. Mila sasana madio ary esorina ny dity aminy vao hohanina sy karakaraina ho an’ny zaza sy ny ankizy.

Mila mailo amin’ny fikarakarana izany ny eny amin’ireo toerana fivarotra ranom-boankazo. Tokony ho azo antoka ny rano sy ny fahadiovan’ny voankazo ahodina vao sotroina. Tsara kokoa, araka izany, ny manamboatra any an-trano satria saro-pady ny fahasalamana.

Tatiana A

“Araka ny tokony ho izy ny fitadiavana Praiminisitry ny maramaritra iraisana”, hoy ny Praiminisitra, ny Jly Zafi­sam­bo Ruphin Fortunat, teny Ambohidahy, ny faran’ny herinandro teo, momba ny fanendrena izay ho Praiminisitra vaovao. Ho marimaritra iraisana mivelatra, ka hanontaniana na ny filoha teo aloha na ny filoham-panjakana amin’izao. Tokony hisy ny fandaminana izany. Tombontsoa ambonin’ny firenena no tanjona. Tsy tokony hisy ny fanilikilihana. Tokony hitohy hatrany koa ny fanelanelan’ny FFKM. Fana­jana ireo andrimpanjakana natao hiaro ny lalàmpanorenana no zava-dehibe aloha. Sata repoblikanina no mifehy ny rehetra.
Antenaina fa fitoniana no entin’ny fahavitan’ny filoham-panjakana fianianana. Mba hahazoan’ny rehetra miverina amin’ny fiainana andavanandro amin’ny fampandehanana ny toekarena izany. Amin’izay toerana misy ny rehetra, tokony hiara-miasa ary tsy hisy ny fanilikilihana. Satria fantatra ny mahatonga ny krizy miverimberina… Maro ny krizy nihatra teto amin’ny firenena. Nisy hatrany ny fanilikilihana. Tsy misy tsy vitan’ny resaka ambony latabatra. Maro dia maro no eritreretin’ny fitondram-panjakana ankehitriny hatao. Tsy ho vita izany raha tsy misy ny fitoniana sy ny fifampiresahana politika am­bony latabatra. Miainga eo dia mandeha lavidavitra kokoa. Tokony haravona avokoa ireo krizy rehetra nihatra hatramin’izay. Raha tsy izany, mbola hiverina hatrany ny krizy any aoriana any. Tena ampiharina ny fifampiresahana. Misy hatrany ny fifampiresahana, ary antenaina fa mbola hisy hatrany izany.

R. Nd.

Notanterahina omaly, ny fanompoam-pivavahana fametrahana ny filoha vaovao eo anivon’ny FJKM, Andriamampia­nina Zaka Hary Masy. Anisan’ny niatrika izany ny filoham-panjakana, Randrianirina Michael. Nambarany tamin’ny lahateniny fa efa nijoro hatrany ho an’ny vahoaka malagasy ny FJKM. Koa, mangataka amin’izy ireo ny tenany mba hijoro hatrany sy hitsangana araka izay asa napetrak’i Jesosy amin’ny tsirairay. Ho mpaminanin’ny firenena, araka ny nambarany. Olon’ny fiangonana izahay ary olon’Andriamanitra ka tenenonareo raimandreny raha sanatria solafaka, araka ny nambarany hatrany. « Teneno izahay ireo hoe : tsy mety ny ataonareo. Manazava izahay raha azo hazavaina. Raha tsy azo hazavaina dia fahadisoana ny dikan’izay ka ovaina ny fomba famindra », hoy izy.

Ho arofanina i Jesoa

Nambarany fa Jesoa, ilay mitarika antsika rehetra no arofanina “Balise” misakana antsika tsy hanaotao foana. Jesoa no tokony atahorantsika, araka ny nambarany.
Notanterahina teny amin’ny FJKM Ambohimalaza Firaisana Kanana Vaovao tamin’io fotoana io ny fametrahana ireo birao vaovao mandrafitra ny fitantanana ny anivon’ny foiben’ity fiangonana ity.
Tsiahivina fa zanaky ny fiangonana eo anivon’ny fiangonana loteranina (FLM) ny filoham-panjakana mivady, ary manana andraikitra amin’izany izy ireo.

Synèse R.

“Tsy nisy fanonganam-panjakana teto Madagasikara, fa tsy nisy fanafihana mitam-basy tany amin’ny lapam-panjakana”. Io ny fanazavan’ny depiote Razafimanantsoa Hanitra tamin’ny famaranana ny hetsika teny amin’ny kianjan’ny 13 mey, Analakely, afakomaly.

Ny didin’ny Fitsarana avo momba ny lalàmpanorenana (HCC) no entina miady eo amin’ny sehatra iraisam-pirenena. Tsy nisy fanonganam-panjakana teto. Fiza­hana fototra ny fahabangan-toeran’ny filohan’ny Repoblika izay tsy nahavita intsony ny asany no nataon’ny HCC. Nilazany fa hita fototra izay fahabangan-toerana izay, tsy nahavita ny asany koa ny filohan’ny Antenimierandoholona ary tsy afa-nanao ny asan’ny filohan’ny Repoblika ny governemanta. Noho izany, notendreny ny Kly Randrianirina Michael ary nomena ny toe­ran’ny filoham-panjakana. Nilaza koa ny didy hoe mbola mijoro avokoa ny andrimpanjakana rehetra voalazan’ny lalàmpanorenana. Manaiky ny didy ny Kly Randrianirina Michael, fanekena fa mbola eo ny HCC.
Nitsiahiviny izay nitranga tamin’ny 14 oktobra. Teo ny fampiatoan’ny Antenimie­ram­pirenena ny filohan’ny Re­poblika amin’ny asany, ny fidinan’ny miaramilan’ny Capsat teny amin’ny kianjan’ny 13 mey, nanambaran’ny Kly Randrianirina Michael fa rava avokoa ireo andrimpanjakana afa-tsy ny Antenimierampi­renena. Fanambarana politika tsy maintsy natao iny mba hampandresy ny tolona. Nisy koa ny fangatahana nataon’ny filohan’ny filoha lefitra fahafito eo anivon’ny Antenimierampi­renena tamin’ny HCC. Tamin’ iny koa no nivaly ny fitoriany ny amin’ny fahabangan-toeran’ny filohan’ny Repoblika.

R. Nd.